Қазақстан мұсылмандары діни басқармасың мәліметінше, Сауд Арабиясы билігі 2025 жылғы 29 сәуір мен 10 маусым аралығында қажылыққа визасыз немесе заңсыз келген адамдарға, сондай-ақ оларға көмектескендерге қатаң шара қолданады, деп хабарлайды Baimedia.kz.
2024 жылы Сауд Арабиясы 300 мыңнан астам шетел азаматының қажылықты заңсыз жасағанын анықтаған. Сол себепті 2025 жылдың 29 сәуірінен бастап бірнеше елдің азаматтарына электронды виза беруді тоқтатты. Бұл – умра визасымен келіп, қажылыққа қалып қойғандар саны көбейіп кеткеннен кейін қабылданған шешім.
Қажылық визасы жоқ шетел азаматтарына, қажылықты орындауға әрекет етіп Мекке және қасиетті орындарға кірген азаматтарға және шетелдіктердің сапарын басқа визалар арқылы ұйымдастырған жауапты өкілдерге 100 мың Сауд Арабиясы риалы (шамамен 26 600 доллар) көлемінде айыппұл қарастырылған. Бұл айыппұл сомасы әрбір жалған виза үшін жеке-жеке түрде есептеледі. Сонымен қатар заңсыз түрде Мекке аумағына кіргендерді жасырғандар, оларды тасымалдаған көлік жүргізушілері, орналастырған қонақ үйлер мен жеке үй иелеріне де 26 600 АҚШ доллары көлемінде айыппұл салынады.
Заңсыз түрде Қажылық жасауға әрекет еткен азаматтар, Сауд Арабиясында уақытша тұрған, уақыты аяқталған немесе заңсыз түрде мекендеп отырған азаматтар елден шығарылып, 10 жыл бойы Сауд Арабиясына кіре алмайды.
Қажылық визасы жоқ шетелдік азаматтарды тасымалдаған транспорттар оларға көмектескен азаматтарға тиесілі болса, ол көліктер сот арқылы мемлекет есебіне өткізіледі.
Виза уақыты аяқталса да, Саудия аумағынан шығып кетпеген шет ел азаматтарына 50 мың риал көлемінде айыппұл, 6 айға дейін қамау жазасы және депортация жазасы белгіленген.
2025 жылы Сауд Арабиясы 1 млн 800 мың қажыларды күтіп алуды және оларға қызмет көрсетуді жоспарлауда. Қажылық жасау тек қана арнайы виза арқылы жүзеге асырылады, басқа кез келген виза түрімен Мекке мен қасиетті жерлердің аумағына кіруге болмайды.
Биыл Қазақстаннан 4500 адам ресми түрде қажылыққа аттанады.