Астана. 18 желтоқсан. BM.KZ — Тәжікстан Сыртқы істер министрлігі Ресейдің елдегі елшісін шақырып, нота тапсырды. Онда Мәскеу облысының Горки-2 кентіндегі мектептің 4-сынып оқушысына жасалған «ұлт араздық негізіндегі шабуылды» қатаң айыптайтыны туралы мәлімдеме жариялады.
Құжатта Ресей тарапынан қайғылы оқиғаны тез арада әрі объективті түрде тергеп, кінәлілердің барлығын заң бойынша қатаң жауапқа тарту талап етілген. Сондай-ақ, Тәжікстан Ішкі істер министрі Рамазон Рахимзода Ресей ІІМ басшысы Владимир Колокольцевпен телефон арқылы сөйлесіп, тергеудің дұрыс жүргізілуін сұрады. Колокольцев өз кезегінде тергеу жұмыстары қатаң бақылауда екеніне сендірді.
16 желтоқсанда ресейлік 10-сынып оқушысы мектепке пышақ алып келіп, күзетшіні пышақтап, газ баллонын шашып, артынша он жасар тәжік баласын пышақтап кеткен.
Оқиға Мәскеу облысының Одинцово қалалық округіне қарасты Горки-2 кентіндегі Успен орта мектебінде болған. Тәжікстанның сыртқы істер министрлігі 4-сынып оқушысы Кобилджон Әлиевтің қаза табуына байланысты ресми мәлімдеме жасап, оқиғаны қатаң айыптады. Қаза болған бала Тәжікстан Республикасының азаматы болған.
Pamir inside мәліметінше, баланың туыстарының айтуынша, ол келесі күні кіші інісі мен ағасымен (нағашысы/көкеcі) бірге Тәжікстанға қайтуы тиіс болған. Себебі төлқұжаттарының мерзімі аяқталуға жақындаған.
18 желтоқсанда оны туған ауданында жерледі.
Кіші інісінің айтуынша, шабуыл жасаған адам пышақпен келіп, олардан қай ұлт өкілі екенін сұраған.
Сол сәтте Кобилджон мұғалімнен сыныпқа кіріп кетуін өтініп, шабуылдаушының назарын өзіне аударуға тырысқан. Алайда сүрініп құлап, бірнеше рет пышақ жарақатын алған. Куәгерлердің айтуынша, шабуыл кезінде ол «Әке!» деп айқайлаған.
Көзкөргендердің сөзінше, шабуыл мұғалім балаларды таңғы ас ішу үшін асханаға алып бара жатқан сәтте болған.
Кобилджонның әкесі бұрын Тәжікстан әскерінде қызмет еткен, алайда үш жыл бұрын ауыр дерттен қайтыс болған. Туыстарының айтуынша, бала әкесі сияқты әскери болуды армандаған, мінезі жұмсақ, мейірімді әрі көпшіл болған.
Радио Озоди мәліметінше, Кабирджонның анасы ұлы қаза тапқан мектепте жұмыс істейтін.