Алматы. 20 тамыз. BM.KZ — Алматы қаласының Бас жоспарын 2040 жылға дейінгі кезеңге бекіту кезінде заң талаптарының бұзылғаны анықталды. Бұл туралы Алматы сәулетшілері одағы жанындағы арнайы консультативтік комиссия хабарлады.
Комиссия мәліметінше, 2025 жылдың мамырынан бері Алматы қаласы мәслихаты аппаратына бірнеше рет ресми сауал хат жолданған. Заң бойынша, Бас жоспарды қарау үшін міндетті түрде бірқатар құжат ұсынылуы тиіс. Мәселен, алдын ала тексеру қорытындысы, сарапшылардың жиынтық қорытындысы, Қоғамдық кеңестің ұсынымдары мен мемлекеттік органдардың келісімдері керек.
Алайда сұратылған құжаттардың орнына комиссияға тек ілеспе хат пен әкімдіктің келісім парағы берілген. Бұған қоса, 2025 жылғы 29 мамыр датасымен «жаңартылған» Бас жоспар жобасы ұсынылған. Бірақ ол заңмен белгіленген рәсімдердің ешқайсысынан өтпеген.
Комиссияның айтуынша, жиынтық сараптамалық қорытынды мүлде жоқ, ал жергілікті сараптамалар дайындалмаған. Бұл — әкімшілік-процессуалдық заңнаманы өрескел бұзу деп бағаланып отыр. Конституциялық сот ұстанымына сәйкес, мұндай жағдайда қабылданған акт заңдық күшке ие болмайды және азаматтардың құқықтары мен мүдделерін реттей алмайды.
Сонымен қатар ресми архивтерде де сәйкессіздіктер бар. Айталық, 2023 жылғы сәуірде әкімдік мәслихатқа үкімет қаулысының жобасын жолдаған. 21 сәуірде мәслихат заңсыз түрде жобаны «қолдаған». Ал 3 мамырдағы үкіметтің №349 қаулысы ресми құқықтық актілер базасында жоқ.
Есесіне, 2025 жылғы 29 мамырдағы «жаңа» нұсқада бұрынғы құжаттарда болмаған тармақтар пайда болған. Бұл құқықтық тұрғыдан жарамсыз екенін айтады комиссия өкілдері.
Сол себепті бұл жағдайды «қарапайым техникалық қате емес, саналы түрде жасалған құжатты бұрмалау» деп бағалап отыр.
«Стратегиялық құжаттарды өзгертетіндер заң алдында жауап беруі тиіс. Бұл мәселені тек қоғамның бақылауы мен ашықтық тоқтата алады», — делінген комиссия үндеуінде.