Астана. 28 қаңтар. /Темірлан Құспаев/ BM.KZ – Өткен жылы Қазақстанда мемлекеттік қолдау арқылы түсірілген шамамен 10 фильм кинотеатрларға жол тартты. Солардың ішінде ең көп табыс тапқан фильм – «Qaitadan», оның кассалық түсімі 1 млрд теңгеден асты.
Биыл қазақстандық көрермендерді, әсіресе «Гарри Поттер» мен «Сақиналар әміршісі» жанкүйерлерін, жағымды жаңалық күтіп тұр. Мәдениет және ақпарат министрлігі балаларға арналған фэнтези жанрындағы «Құт» фильмін прокатқа шығаруды жоспарлап отыр. Бұл туралы ведомство BM.KZ-тің ресми сұранысына берген жауабында хабарлады.
Сонымен қатар, 2026 жылы мемлекеттік қолдаумен түсірілген тағы бірнеше фильм көрерменге жол тартады. Олардың қатарында қырғыз жазушысы Талип Ибраимовтың «Күзгі самал» шығармасы негізінде түсірілген драмеди және Францияда халықаралық марапаттарға ие болған «Әбіл» фильмі бар.
«2026 жылдың қаңтар айында «Жұмақтан билет» пен «Гипноз» фильмдері прокатқа шықты. Ал «Кинопоиск» онлайн-платформасында «Операция “Набат”», «Соңғы үкім», «Жамбыл. Жаңа дәуір», «Капитан Байтасов», «Игроманка», «Патриоттар уақыты» сияқты фильмдер қолжетімді», — делінген Мәдениет және ақпарат министрлігінің хабарламасында.
Ал 2025 жылы аяқталған «90+1», «Тарлан», «Игроманка», «Капитан Байтасов», «Qaitadan» және «Алтын адам» анимациялық фильмі халықаралық және ұлттық кинофестивальдерге қатысады.
Министрлік өкілдері мемлекеттік қолдаудың басты мақсаты коммерциялық табыс емес екенін атап өтті.
«Негізгі міндет – жас ұрпақты ұлттық құндылықтар мен ел тарихына баулу, сондай-ақ жас режиссерлер мен дебюттік жобаларды қолдау. Осы бағытта мемлекет қолдауымен 30-дан астам фильм түсірілді. Бұл саладағы кәсіби кадрлық әлеуеттің қалыптасуына және ұлттық кинематографияның тұрақты дамуына ықпал етеді», — деп мәлімдеді ведомство.