Астана. 30 қыркүйек. BM.KZ – Шығыс Қазақстан мен Абай облыстарында жаз бойы қорек таппай қалған аюлар қыста ұйқыға кетпеуі мүмкін. Себебі биыл жеміс-жидек пен кедр жаңғағы аз өнім берген. Осыған байланысты ауыл тұрғындары жыртқыш аңдардан зардап шегеміз бе деп алаңдаулы, деп хабарлайды Kazinform.
ШҚО тұрғындары көктемнен бері елдімекендер маңында аюлардың жиі көрінгенін айтып, құзырлы органдарға шағымданған. Әсіресе Риддер, Серебрянск, Поперечное, Михайловка және Глубокое ауылдарының халқы түз тағысын бірнеше рет кездестірген.
— Тұрғындардан әр апта сайын шағым түседі. Жануарлар мемлекет қарауында болғандықтан оларды түгел атып тастай алмаймыз. Біздің инспекторлар шағым түскен жерге барып, қатты дыбыс пен жарықты қолдану арқылы аюды үркітіп, ауыл маңынан алшақтатуға тырысады, — деді Орман және аңшылық жедел әрекет ету жасағының инспекторы Вадим Литвиненко.
Оның айтуынша, аюлар қорек іздеп, көбіне омарталардағы бал иісіне, мал сойғаннан қалған қалдықтарға немесе балық цехынан шыққан иіске тартылады. Бұл олардың малға шабуына да себеп болып жатады.
Ұқсас жағдай Абай облысында да тіркеліп отыр. Жарма ауданының тұрғындары қоңыр аюдың шабуылдарына қатысты бірнеше рет шағымданған.
— Жарма ауданы Қалбатау ауылында тамызда бал омарталарына қоңыр аюдың шабуылдағаны туралы бірнеше ақпарат келіп түсті. Осыған қатысты жергілікті атқарушы орган өкілдері, құқық қорғау органдары, тиісті басқарма басшылары бірлесіп, мемлекеттік үлгідегі аңшылық куәлігі бар және қаруды сақтау мен алып жүруге рұқсаты бар 28 адамнан құралған арнайы комиссия құрды. Бұл комиссия тұрғындардан шағым түскен жерге баруға әзір отыр. Көктемде аю бір ірі қараны жарып тастаған. Одан өзге мұндай жағдай тіркелген жоқ, — деді аудан әкімінің орынбасары Райым Жолдасбеков.
Ал Жарма аудандық полиция бөлімі әлеуметтік желілерде тараған жалған ақпаратқа түсініктеме берді.
— Ел арасында Георгиевка ауылында аю ерлі-зайыптыларға шабуыл жасады деген ақпарат тараған. Бұл оқиға Ресейдегі Георгиевка ауданында болған. Жарма ауданы Қалбатау ауылының бұрынғы атауымен шатасқан тұрғындар дүрлігіп кетті. Осы орайда, полиция бөлімі тұрғындарды шындыққа жанаспайтын ақпарат таратпауға шақырады. Егер жалған мәлімет бұқаралық ақпарат құралдарында немесе онлайн-платформаларда таратылса 3000 АЕК (11 млн теңгеге жуық) айыппұл немесе үш жылға дейін бас бостандығын шектеу не айыру жазасы қарастырылған, — делінген полицияның хабарламасында.