Шымкент. 8 тамыз. /Нұргүл Ерғалиқызы/ BM.KZ – 2024 жылы 8 шілде күні ойын саласындағы құқықбұзушылықтың алдын алуға байланысты бірқатар заңдарға өзгеріс енгізілген болатын.
Осыған байланысты, құзырлы орган өкілдері бірқатар тексеру, зерделеу жұмыстарын жүргізді. Нәтижесінде, құмар ойынның қызығында кеткен мемлекеттік қызметкерлердің әрекеті әшкере болған. Мәселен, Шымкент қалалық прокуратурасының бастамасымен 50 азаматтың 443 млн теңге бәс тіккені анықталған.
Қазіргі таңда, 14 қызметкер өз еркімен жұмыстан кетіп, тәртіптік жазаға тартылған. Ал 10 қызметкер қызметтік әдепті өрескел бұзғаны үшін теріс себептермен жұмыстан шығарылған деп хабарлады Шымкент қаласы әкімінің орынбасары Сәрсен Құранбек. Ал, 20 қызметкерге қатысты қызметтік тергеп-тексеру жұмыстары жүргізіліп жатыр.
«Біз бұл жағдайда өзгеше әрекет ете алмаймыз. Әрине, оларға жанымыз ашиды. Білікті мамандар болуы да мүмкін. Алайда бұл-дерт. Олар соған шалдықты. Оның үстіне теріс қылықпен жұмыстан кеткен соң, басқа жұмысқа орналасуы да қиынға соғады. Оны да түсініп, біліп отырмыз. Алайда, заң – баршаға ортақ. Сондықтан заң талаптары қатаң сақталуы тиіс», – деді Сәрсен Құранбек.
Естеріңізге сала кетейік, Шымкентте жалпы талдау барысында жергілікті атқарушы органның 161 қызметкері интернет желісі арқылы олимпбет тотализаторына бәс тіккені анықталған болатын. Олар, құмар ойынға 757 млн теңге жұмсаған. Оның ішінде 50 қызметкер заң қолданысқа енгеннен кейін 443 млн теңге бәс тіккен.