Астана. 24 қыркүйек. BM.KZ – Сот сараптамалары орталығы виртуалды аутопсия жобасын пилоттық режимде іске асырып жатыр. Бұл туралы Әділет министрлігіне қарасты Сот сараптамалары орталығының директоры Бақытжан Байтілесов Орталық коммуникациялар қызметінде өткен брифинг барысында мәлімдеді.
– Виртуалды аутопсия адам денесін ашпай-ақ, арнайы аппарат арқылы ішкі мүшелерін тексеруге мүмкіндік береді. Алғашқы нәтижелер бұл жүйенің дәстүрлі аутопсиямен бірдей жұмыс істейтітінін көрсетті. Егер бәрі сәтті жүзеге асса, жаңа әдісті ел бойынша қолдану көзделіп отыр. Жалпы сот сараптамасы – әділ және нақты шешім қабылдауға көмектесетін маңызды бөлім. Қылмысты тергеу тиімділігі мен қоғамның сотқа сенімі зерттеу сапасына тікелей байланысты. Сондықтан салаға цифрландыру мен инновациялық технологияларды енгізу өте қажет ,- дейді жауаптылар.
Бақытжан Байтілесовтың айтуынша, виртуалды аутопсия жобасы қазіргі таңда Атырау қаласындағы Сот сараптамалары орталығы филиалының базасында жүзеге асырылып жатыр.
«Пилоттық жоба бойынша жұмыс жалғасып жатыр. Егер әрекеттер оң нәтиже беріп, тиісті жабдықтар сатып алынатын болса, бұл әдіс еліміздің барлық өңірлерінде кезең-кезеңімен енгізілетін болады», – деді Бақытжан Байтілесов.
Спикер 2023–2025 жылдарға арналған есірткіге қарсы күрес жөніндегі кешенді жоспар аясында зертханалар синтетикалық есірткілерді анықтауға арналған заманауи құрылғылармен жабдықталып жатқанын мәлімдеді. Бастапқыда 9 жабдық алу жоспарланғанымен, кейін сатып алу құны қайта қаралып, 32 құрылғы сатып алынған. Бұл – мемлекеттік қаржыны тиімді пайдалану мен зертханалық әлеуетті арттыру бағытындағы маңызды қадам.
Сатып алынған хроматографтар мен спектрометрлер сарапшыларға есірткі заттарының іздік мөлшерін дәл анықтап, химиялық құрамын нақты белгілеуге мүмкіндік береді. Бұл құралдар 2025 жылдың қазан–қараша айларында пайдалануға беріледі деп жоспарланып отыр.
Брифингте Бақытжан Байтілесов сот сараптамасын тағайындау кезінде жиі кездесетін сұрақтар мен қажетті материалдар тізбесін қамтитын арнайы «Анықтамалық» әзірленгенін айтты. Бұл құжат құқық қорғау органдары қызметкерлерінің сараптама тағайындау ісінде сауатты әрекет етуіне көмектеседі.