Астана. 7 қазан. BM.KZ – Солтүстік Қазақстан облысы Бугровое елді мекенінде үй құстары пастереллез ауруынан қырылған, деп хабарлайды Kazinform.
Бугровое ауылының тұрғыны Мағжан Ақылбаев қаз шаруашылығымен айналысу үшін 10 млн теңге несие алған. Екі апта ішінде 5 мың құстың жартысына жуығы қырылып қалды.
– Бұған дейін екі рет сараптама пастереллезді көрсетпеді, тек үшіншісінде ғана бұл ауру расталып отыр. Енді тәуелсіз сараптама жасатпақшымыз. Өйткені барлық белгісі құс тұмауына келеді. Пастереллез дегенге сенбеймін. Қаншама қаражат, еңбек еш болды. Өтемақы төленгенін қалаймын, әрине. Өйткені 31 желтоқсанға дейін қарызды жабуым керек, — дейді Мағжан Ақылбаев.
Келген мамандар ауыл тұрғынына қалған құсты сойып алуға кеңес берген. Өйткені пастереллездің емі жоқ.
– Пастереллез жабайы құстардан жұғуы мүмкін. Ауылда көлдер жетерлік. Пастереллезге қарсы ем жоқ, өйткені тұрғындар қандай ғана антибиотик бермеді.
Бұл ауылда 3 мыңнан артық құс қырылды. Өлген қаз мал қорымында жойылды. Кейін тереңдігі 3 метрлік ор қазылып, өлген құс өртеліп жатыр. Ауыл әкімі қаншасы жойылғанын бақылауда ұстап отыр. Әрі қарай таралмауы үшін қора-қопсыға дезинфекция жасалып жатыр. Ертең бұл жұмыс қайта жүргізіледі. Ең бірінші болып құстары ауыра бастаған тұрғындарда 4-5 күн болды, өлім-жітім тоқтады, — дейді Қызылжар аудандық ветеринарлық станцияның директоры Ерлан Багенов.
Қызылжар ауданында құс тұмауы соңғы рет 2020 жылы тіркелген екен.
– Өлген құстардан, қанынан және түрлі мүшелерінен үш рет сараптамаға материал алынды. Құс тұмауы расталмады. Тек бүгін ғана сараптама қорытындысы келіп, пастереллез екені анықталды. Екі күн бұрын тағы да қосымша сараптамаға материал алынып, жіберілді. Тұрғындарды, әрине, өтемақы мәселесі қызықтырады. 2020 жылы құс тұмауы болғанда, 2024 жылы мал-құс суға кеткенде есепте болсын-болмасын – өтемақы толық төленді. Бірақ пастереллез – аса қауіпті аурулар тізілімінде жоқ. Яғни вакцина да, өтемақы да қарастырылмаған. Бірақ аудан әкімі бұл мәселені шешуге уәде етті, бюджеттен тыс қаржы тауып, төленеді. Ол ертең ауылға өзі барып, құсы қырылған 14 отбасымен кездесіп, түсіндіреді, — дейді Ерлан Багенов.
Маманның айтуынша, биыл Қызылжар ауданында ғана тұрғындардың 89 мың құсына вакцина егілген. Былтыр 133 мың бас құсқа тегін вакцина салынды.
– Жұрттың кейбірі жасырады, екпе тегін болса да салдырмайды. Ветеринарлар мәліметті тек әкімдіктерден ғана алады. Бугровое елді мекенінде неліктен құс жаппай қырылды. Біріншіден, мұнда үй құстары көп шоғырланған болып шықты. Шаруашылық кітабында қаз-үйректер есепке алынбаған. Мысалы тұрғындар көктемде балапанды сатып алды, күзде сойып, өткізеді. Бірақ заңда анық жазылған, сатып алынған үй құсы не жануар үш күн ішінде ветеринар дәрігерге не әкімдікке хабарлануы керек, — дейді ветеринар.