Шымкент. 29 тамыз. BM.KZ – Шымкентте 11 жасар жасөспірім суретке түсемін деп, электр тоғына түсті. Оқиға 27 тамыз күні теміржол вокзалында болған.
Белгілі болғандай, бала жүк вагондарының үстіне арнайы баспалдақ арқылы көтерілген. Осы сәтте ол 27 мың вольттық жоғары кернеулі электр тоғына түсіп қалған. Нәтижесінде денесінің 80 пайызы күйік шалып, ауыр халде ауруханаға жеткізілген. Ал жауаптылар мұндай жайттың алдын алу үшін түсіндірме жұмысын жүргізіп жатқандарын айтады.
“Шымкент бекетінде станцияның басында жас бала 11 жасар вагонның үстіне шығып, суретке түсем деп, токқа түсіп жатыр. Осындай орын алып жатқан себептерден күнделікті өзіміз қадағалауға алып жатырмыз жұмыстарды. Мектептерге шығып жатқан топтарымыз бар теміржол саласында құрылған”, — дейді магистральдық желі дирекциясының қауіпсіздік жөніндегі атқарушы директоры Серік Айқынбеков.
Желілік полиция өкілдерінің айтуынша, жасөспірім вокзал есігі арқылы кірмегендіктен бейнебақылау камерасына да түспеген. Қазір бұл оқиғаға байланысты қылмыстық іс қозғалып, тергеу амалдары жүріп жатыр.
“ҚР ҚК «Темір жол көлігін пайдалану және қозғалыс талаптарын бұзу фактісі бойынша сот тергеу амалдары жүргізілуде. Қазіргі таңда іс бойынша тергеп-тексеру жүріп жатыр. Өзге ақпараттар ҚПК талаптарына сәйкес жария етілмейді. Осы сәтті пайдалана отырып Шымкент қаласы және облыс тұрғындарына теміржол өте қауіпті аймақ екенін ескертемін”, — дейді Шымкент станциясы желілік полиция бөлімінің басшысы Нұрлан Қошқарбеков.