Астана. 30 қыркүйек. BM.KZ – Ауғанстанды басқарып отырған тәліптер өздері «имморальды құбылыстарға қарсы күрес» деп сипаттайтын саясат аясында дүйсенбі күні елді толықтай интернеттен ажыратты. Бұл туралы интернетті бақылаумен айналысатын халықаралық NetBlocks қызметі хабарлады, деп жазады BBC Russian.
Ауғанстанда талибан билігі «мораль нормаларын енгізу» деген сылтаумен интернетті толық өшірді. NetBlocks халықаралық бақылау қызметінің мәліметінше, дүйсенбі күні таңертеңнен бастап елдегі бірнеше желі біртіндеп ажыратылған, сонымен қатар телефон байланысы да істемей қалған.
Кабулдың тұрғындары BBC-ге берген сұхбатында шамамен кешкі сағат беске қарай талшықты-оптикалық интернет мүлде тоқтап қалғанын айтты.
Ал халықаралық AFP агенттігі Кабулдағы өз бюросымен байланысын жоғалтқанын хабарлады. Тіпті ұялы телефон арқылы да тілдесу мүмкін болмаған.
Ел көлемінде мобильді интернет пен спутниктік телеарналардың жұмысы күрделі іркілістерге ұшыраған. Бұдан бөлек, Ауғанстан астанасынан түскен мәліметке сәйкес, Кабул әуежайындағы бірнеше әуе рейсі де тоқтатылған.