Тараз. 9 қыркүйек. BM.KZ – Жамбыл облысында 1-2 сыныптың ұлдары 1 қызды жан-жақтан жұлқылаған бейне әлеуметтік желіде тарады. Видео дәретханада түсірілгені байқалады.
Бұл жағдай 5 сәуірде Н. Тілендиев атындағы көп балалы және аз қамтылған отбасылардың балаларына арналған мектеп-интернатта болған. Алайда ешкім құзырлы органға хабар бермеген. Сондықтан полиция департаменті іс қаралмағанын айтады, бірақ әлеуметтік желіге тараған бейнежазбадан соң түсіндіру жұмысы жүргізілген.
“Аталған дерек бойынша полицияға арыз түскен жоқ. Сонымен қатар, орын алған оқиғаның барлық мән-жайын анықтау мақсатында бейнематериал негізінде тиісті тексеру жүргізілді. Заңды өкілдерімен заңнаманы бұзған жағдайда жауапкершілік шаралары түсіндіріліп, профилактикалық әңгімелер жүргізілді”, – дейді Жамбыл облыстық ПД баспасөз қызметі.
Ал білім басқармасы бұл оқиғаға жауаптыларға тәртіптік шара қолданылғанын айтады.
“2025 жылғы 5 сәуірде орын алған оқиғаға байланысты мектеп-интернаттың жауапты қызметкерлеріне тәртіптік жаза қолданылды. Оқиға туралы уәкілетті органдарға уақытылы хабарламағаны үшін мектеп-интернат директоры да Қазақстан Республикасының Еңбек кодексіне сәйкес тәртіптік жазаға тартылды”, – делінген облыстық білім басқармасының хабарламасында.
Сонымен қатар, мектеп-интернат директорының үстінен ҚР «Әкімшілік құқық бұзушылық туралы» кодексіне сәйкес әкімшілік іс қозғау туралы ұсыну хат жолданған.