Астана. 14 қаңтар. BM.KZ — Қатты аяз кезінде Теміртауда магистральдық жылу құбыры зақымданып, екі шағынаудандағы тұрғын үйлер жылусыз қалды.
Кеше кешкі уақытта Теміртау қаласындағы 8-ші және Отрадное шағынаудандарын жылумен қамтамасыз ететін магистральдық жылу желісінде апат тіркелді. Бұл туралы ақпарат әлеуметтік желілерде тарады.
Құбырдың жарылуы салдарынан шамамен 40 көпқабатты тұрғын үй, бірнеше жеке тұрғын үй, сондай-ақ бизнес нысандары мен әлеуметтік мекемелер жылусыз қалған. Апат ауа райы күрт суытып, өңірде температура –30 градусқа дейін төмендеген кезде орын алған.
Теміртау қаласының әкімі Ғалым Әшімовтің айтуынша, зақымдану 1970 жылдардан бері күрделі жөндеуден өтпеген, тозығы жеткен құбыр учаскесінде анықталған. Қалпына келтіру жұмыстарына мамандар мен апаттық-қалпына келтіру бригадалары жедел түрде жұмылдырылды. Барлық қажетті техника мен күштер тартылып, ақауды жою жұмыстары үздіксіз жүргізілді. Әкімдік жағдайдың барысы туралы қосымша ақпарат берілетінін хабарлады.
Қала әкімдігінің мәліметінше, бүгін сағат 10:00-дегі жағдай бойынша ақау толық жойылды. Қазіргі уақытта жылу жүйесін толтыру жұмыстары жүргізіліп, тұрғын үйлерге жылу беру кезең-кезеңімен қалпына келтірілуде.