АСТАНА. 22 қыркүйек. BM.KZ – АҚШ президенті Дональд Трамп пен кәсіпкер Илон Маск 21 қыркүйек күні Аризона штатында өткен марқұм Чарли Киркке арналған қоштасу рәсімінде қатар көрінді. Бұл олардың мамыр айындағы келіспеушіліктен кейін алғаш рет бірге көпшілік алдына шығуы, деп хабарлайды Lianhe Zaobao.
CNN дерегінше, шара спорт аренасында өткен. Трамп пен Маск президенттік ложада қатар отырып, әңгімелескен. БАҚ-та жарияланған суреттерде олардың қол алысып, жылы шырай танытқаны байқалады. Кейінірек Маск әлеуметтік желіде Трамппен сөйлесіп отырған сәтін жариялап, суретке «Чарли үшін» деп жазды.
Қорғаныс министрі Пит Хегсест сөз сөйлеп жатқанда да қос тұлға қызу пікір алмасып отырғаны көзге түскен. Маск әңгімені мұқият тыңдап, жиі бас изеген. Бұл – миллиардердің мемлекеттік қызметтен кеткеннен кейінгі алғашқы бірлескен ресми көрінісі болды.
Журналистердің сұрақтарына жауап берген Дональд Трамп:
«Ол (Маск) келіп сәлемдесті. Қарым-қатынасымыз өте жақсы», – деді. Ақпарат көздеріне сүйенсек, Чарли Кирк екі жақтың байланысын қайта орнатуға ықпал еткен. Ол Маскпен жиі сөйлесіп, саяси мәселелер бойынша пікір алмасып отырған.
Еске сала кетейік, мамыр айында Трамп пен Маск арасында келіспеушілік туған болатын. Маск әлеуметтік желілерде Трамптың кейбір бастамаларын сынға алып, саясатта жаңа бағыт қажет екенін айтқан. Бұған жауап ретінде Трамп кәсіпкердің пікірін сынап, өз командасына қосылмағанын ашық білдірген еді.