ШҚО. 22 тамыз. BM.KZ — Үржар ауданында орын алған қайғылы жол апатынан қаза тапқан үш баламен қоштасу рәсімі өтті. Қаралы жиынға марқұмдардың туыстары, ауыл тұрғындары және жергілікті билік өкілдері жиналды. Бұл туралы 7 арна хабарлады.
Қаза болған екі қыз, бір отбасының балалары. Оларды Жарма ауданына қарасты Жаңғызтөбе ауылында жерледі. Ал, екі жасар Нұраділ Елтай ауылында жер қойнына тапсырылды.
Апат кезінде аман қалған тағы екі бала қазір Астанадағы ауруханада жансақтау бөлімінде жатыр. Дәрігерлер олардың жағдайын орташа ауыр деп бағалап отыр. Сол себепті марқұмдардың анасы кіші ұлын ақтық сапарға шығарып сала алмады. Сонымен қатар, 9 жастағы тағы бір қыз бала аудандық ауруханада ем қабылдап жатыр.
Жол апатына себепкер болған 55 жастағы жүргізуші сол ауылдың тұрғыны. Ол 20 жыл бойы автобус жүргізіп келген. Туыстарының айтуынша, оқыс оқиға болған күні ер адамның денсаулығы сыр беріп, талмасы ұстап қалған. Соның салдарынан көлік тізгініне ие бола алмаған.
«Балаға бас сүйекке трепанация отасы жасалды. Қазіргі жағдайы тұрақты ауыр, өзгеріссіз. Өкпесі жасанды желдету аппаратына қосылған. Қазір тек күту ғана қалды. Болжау айтуға әлі ерте», – деді Үржар аудандық ауруханасы бас дәрігерінің орынбасары Мәдина Ноғайбаева.
Ал, балаларды қағып кеткен азаматтың баласы, Ерқанат Серікұлы, әкесінің жағдайы мүшкіл екенін жеткізді.
«Әкемнің жағдайы өте ауыр. Қазір қамауда. Адамдарды танымайды, себебі талмасы ұстап қалған. Сол сәтте рөлге ие бола алмаған. Қасында анам отырған. Бәрі бір сәтте болды. Бұл үлкен қайғы. Қаза тапқандардың отбасына көңіл айтамыз. Кешірім сұраймыз», – деді Ерқанат Серікұлы.