АСТАНА. 24 қыркүйек. BM.KZ – Жамбыл облысының Қордай ауданында қызметкер екі жылдан астам уақыт жалақысын ала алмай, ақыры сотқа жүгінді. Нәтижесінде жұмыс берушіден 92,3 млн теңге қарызды өндіріп алды, деп хабарлайды Қордай аудандық сотының баспасөз қызметі.
Қордай ауданының тұрғыны 2020 жылдың желтоқсан айында жергілікті компанияның күрделі құрылыс бөлімін басқаруға қабылданған. Еңбек шартына сәйкес, оның ай сайынғы жалақысы 1 млн теңге болып белгіленген. Алайда жарты жылдан кейін еңбекақысы жүйелі түрде кешіге бастады. Ал 2021 жылдың шілдесінен бастап 2023 жылдың маусымына дейін ол бір тиын да алмаған.
Компания басшысы берешекті мойындағанымен, екі жыл бойы қарызды төлемей келген. Қызметкер амалсыз сотқа шағым түсірді.
Бұл істі жуырда Қордай аудандық соты қарады. Барлық дәлелдемелерді зерттеген соң, сот талапкердің арызын толық қанағаттандырды.
Сот шешімінде ЖШС «М» атына тіркелген компания қызметкерге еңбекақы бойынша қарыз – 92,3 млн теңгені толық өтеуге міндеттелді. Бұған қоса, жұмыс беруші 923 мың теңге көлеміндегі мемлекеттік бажды төлеуі тиіс екені көрсетілген.
Соттың шешімі заңды күшіне енді.
Айта кетейік, Қазақстан Еңбек кодексінің 23-бабына сәйкес жұмыс беруші еңбекақы мен өзге де төлемдерді уақытылы төлеуге міндетті. Аталған жағдай еңбек құқығының өрескел бұзылуы ретінде бағаланды.