Астана. 13 тамыз. BM.KZ – Ақтау қалалық полиция басқармасының подполковнигі Лейла Саидова әлеуметтік желіде тараған бейнежазбадан кейін жұрт назарын аударды. Ондағы подполковниктің сұлулығын әйгілі актриса Моника Беллуччиға теңеп жатқандар бар. Baimedia.kz көпшілік ықыласына бөленгенн сол полиция қызметкеріне хабарласып, жағдайдың мән-жайын біліп, сонымен бірге, өзі жайында да біраз жайға қанықты.
Видео авторы полицейді салғырттық пен қызметтік міндетін орындамады деп айыптаған еді. Ал жұртшылық оның орнына подполковниктің ажарлы көркіне тамсанып, негізгі мәселе көмескіленіп қалды. Өзінің айтуынша, полиция сапында 18 жылдан бері еңбек етіп келеді, 41 жаста, отбасылы, бір ұл тәрбиелеп отыр. Сөзіне қарағанда, бала күнгі арманы болғандықтан, осы салаға өз таңдауымен келген.
«Мен үшін әрдайым адалдық пен әділдіктің маңызы зор. Полицияда қызмет ету үлкен жауапкершілік пен ауыр еңбек, қауіп пен сынға толы жұмыс. Кейде бәрін тастап кеткің келетін сәттер болады. Ондайды әр полицей бастан өткереді», — дейді ол.
Ал қызметтен тыс былайғы кезде уақытын туған-туысы мен жақындарына арнап, қарапайым тіршілік ететінін айтады. Құқық қорғау органдарында жұмыс істейтін әйелдің мінезі мықты, төзімді әрі әділдікті жақтап отыруы керек деген ұстанымда. Ал әлеуметтік желілерде аяқасты танымал болып кеткеніне аса мән бермейтінін айтады.
Мұндай оқыс жағдайға қызмет барысында алғаш рет тап болған ол сол шулы оқиға болған сәтте барынша сабырлы болуға тырысқанын жеткізді. Есесіне, содан бері өзіне қолдау білдірген барша жанға алғысын білдірді.
Айта кетейік, тамыздың басында әлеуметтік желіде Ақтаудағы әкімшілік полиция ғимаратында түсірілген даулы бейнежазба тараған еді. Онда әйел адам полиция қызметкерінен қызметтік куәлігін көрсетуді талап етеді. Бірақ, тәртіп сақшысы барынша салқынқанды болуға тырысып, жағдайды ушықтырмауға тырысады.