Астана. 5 тамыз. /Нұргүл Жолымбетова/ BM.KZ – Жоғалған тікұшақ экипажын іздеу 12 күннен бері қиын әрі гидрографиялық жағдайда үздіксіз жүріп жатыр, деп хабарлады Қорғаныс министрлігі.
«Іздестіру-құтқару жұмыстарына 330-дан астам маман, 59 техника, 23 жүзу құралы, 12 ұшқышсыз ұшу аппараты, эхолоттар, георадарлар, авиация және кинологиялық есептоптар тартылған», – деп жазылған мәлімдемеде.
Айта кету керек, Қорғаныс министрлігінің мамандарымен қатар, Төтенше жағдайлар министрлігі, Ішкі істер министрлігі және басқа да мемлекеттік құрылымдардың өкілдері де іздеу жұмыстарына атсалысып жатыр.
Әскери-әуе күштерінің қолбасшысы, авиация генерал-майоры Асқар Ізбасовтың айтуынша, ауа райының тұрақсыздығы, көл түбінің терең шөгуі мен су астында түк көрінбеуі іздеу жұмыстарын қиындатып отыр. Соған қарамастан, жұмыстар тәулік бойы тоқтаусыз жүріп жатыр.
«Өтуі қиын аудандарды әуеден шолып, жағалау белдеуі мен көл акваториясын тексеру үстіндеміз. Суасты және жерүсті іздеулеріне арнайы жабдықтарды пайдаланатын ғылыми және техникалық ұйымдар тартылған. Сонымен бірге, техникалық тергеу жалғаса береді. Комиссия әуе кемесін дайындау және пайдалану жөніндегі құжаттаманы, құқық қорғау органдары мен авиациялық қызметтердің материалдарын, тікұшақ бағытындағы метеорологиялық және орнитологиялық жағдайды және басқа да факторларды зерделеп жатыр», – деді әскери-әуе күштерінің қолбасшысы Асқар Ізбасов.
Естеріңізге сала кетейік, 25 шілде күні ЕС-145 әскери тікұшағы радардан жоғалып кеткен болатын. Бірнеше күн өткен соң, Алматы облысындағы Сорбұлақ су қоймасынан әскери тікұшақ экипажы мүшелерінің жеке заттары табылған еді. Іздеу жұмыстары тікұшақ экипажының тағдыры мен апатқа себеп болған жайттар толық анықталғанға дейін жалғасады.