Астана. 25 желтоқсан. BM.KZ – Жыл соңында көптеген ұйымдарда жұмыс жүктемесі әдеттегіден арта түседі. Есептер, қорытындылар, жобаларды жабу және келесі кезеңді жоспарлау бір жыл бойы жиналған шаршаумен қатар келеді. Соның салдарынан тіпті тұрақты ұжымдардың өзінде тиімділіктің төмендеуі мен ішкі шиеленістің өсуі байқалуы мүмкін.
Медициналық технологиялар және ақпараттық жүйелер орталығының (МТАЖО) сарапшыларының пікірінше, жыл соңындағы өнімділікке әсер ететін негізгі фактор — тапсырмалардың көлемі емес, команда ішіндегі күйзеліс деңгейі.
Созылмалы стресс қызметкерлердің эмоционалдық жағдайына ғана емес, қабылданатын шешімдердің сапасына да тікелей ықпал етеді. Үздіксіз қысым жағдайында назар шоғырлануы төмендеп, коммуникация әлсірейді және кәсіби күйзеліске түсу қаупі артады.
МТАЖО мамандарының байқауынша, бұл кезеңде қызметкерлер көбіне формалды түрде әрекет етіп,жаңа бастамадан қашқақтайды және тек «жыл соңына жетуді» мақсат етеді. Бұл өз кезегінде жалпы көрсеткіштерге әсер етеді
Ұжымдағы психологиялық ахуал басқарушылық шешімдер мен қарым-қатынас стилі арқылы қалыптасады. Әсіресе жыл соңында бұл факторлар зор мағынаға ие болады.
Сарапшылар басшыларға келесі практикалық қадамдарға назар аударуды ұсынады:
• Басымдықтарды нақты белгілеу. Қызметкерлер үшін қандай міндеттердің шынымен маңызды екенін түсіну күйзелісті азайтады.
• Артық шұғылдықты қысқарту. Үнемі «бәрі жедел» режимінде жұмыс істеу сапаны төмендетеді.
• Ашық коммуникацияны сақтау. Сұрақ қоюға және қиындықтарды талқылауға мүмкіндік беру ұжымдағы алаңдаушылықты азайтады.
• Қызметкерлердің үлесін мойындау. Кәдімгі ауызша алғыс та мотивацияны сақтауға көмектеседі.
• Команданың ресурсын ескеру. Жүктемені дұрыс бөлу күрт өнімділік төмендеуінің алдын алады.
МТАЖО тәжірибесінде жағымды жұмыс атмосферасын орнату ұжымды басқарудың жүйелі бөлігі ретінде қарастырылады. Коммуникация мен ішкі ахуалға мән беретін ұйымдар тұрақты нәтижелер көрсетіп, жоғары жүктемеден кейін тезірек қалпына келеді.
Мамандардың айтуынша, мұндай командалар жаңа жылға жинақы күйде кіріп, стратегиялық міндеттерді шешуге дайын болады.
Жыл соңы — тек қорытынды шығаратын кезең ғана емес, сонымен қатар ұжымның болашақ жағдайына әсер ететін басқарушылық шешімдер қабылданатын уақыт. Күйзеліс деңгейін төмендету және жұмыс ортасына назар аудару ағымдағы нәтижелерді сақтап қана қоймай, келесі жылға берік негіз қалайды.