Қарғын су басып, халық сабылған бұл кезде өтер кетер. Жаңа елдімекендер салынар, жұрт қайтадан баспаналы болар. Уәдесінен тайып кетпесе, үйсіз-күйсіз, малсыз қалғандарға өтемақыда төленер. Алайда, халықты, тұтас мемлекетті әуре-сарсаңға салған, мемлекеттің бюджетіне миллиардтаған шығын әкелген тасқынға кінәлілер жазадан құтылып кете ме? Мәселенің үлкені осы. Біз, жасылдар партиясы еліміздегі су ресурстары саласындағы былықты талай мәрте көтердік. Айттық. Алайда құлаққа ілген ешкім болмады. Дер кезінде айтқанымызбен жазғандарымызға құлақ асқан Үкімет болса, дәл қазіргі қиын жағдай болмас па еді? Бүгінгі жағдайға кім кінәлі дегенге келетін болсақ, тасқынын болатынын көріп,біле тұра қамсыз отырған жергілікті әкімқаралар, Төтенше жағдайлар министрлігі, Үкімет. Жағдай реттелген соң, бұлардың бәрі сұраққа алынып, жауап беруге тиіс. Сондай-ақ, жекеге өтіп кеткен су қоймаларының иелеріде жауапкершіліктен құтылып кетуге тиіс емес. Өйткені су қоймаларын жекешелендіріп алғандар оған инвестиция салмады. Тек барды пайдаланды. Тиын шығармай пайда көруге тырысты. Әрине, кеше ғана Үкімет басына келген Олжас Бектеновты кінәлаудан аулақпыз. Себебі ол әлі етек-жеңін жинап, қызметке сұғына кірісіп кетті деп айта алмаймыз. Ал, оның алдындағы премьер министрлер Әлихан Смайылов, Асқар Мамин, түрмеде отырған Кәрім Мәсімов тб кінәлі деп ойлаймын. Өйткені су тасқыны елімізде бірінші рет болып жатқан жоқ. Жылда осы. Бірақ содан қортынды шығарды ма, осы Үкімет басшылары. Жоқ. Тек салдарымен күресіп, сылап-сипап қана қоя салды. Егерде сол экс Үкімет басшылары су саласының мамандарын тартса, КСРО кезіндегі тасқын сумен күресудің тәжірибелерін таразылап, қарғын су жүретін жолдарға бөгеттер орнатса, тоғандар қазылса, қарғын суды жинап, жазда егістікке пайдаланатындай су қоймаларын салса, әңгіме басқа болар еді. Бірақ олар сондай проблемалар барын көріп тұрып, қолға алмады ғой. Мәселені жүйлі түрде шешетін орталықтар құрмады. Ал, солар артқа тастап кеткен қордалы мәселелер енді міне алдымыздан шығып, қаншама елдімекенді су басып қалды. Ал, қазіргі Бектенов басқарған үкімет осының бәрін таразылап, қортынды шығаруы керек. Әлемдік ақпарат көздері биылғы жаз жылдағыдан ыстық болады, әлемде қуаңшылық жайлайды деп дабыл қағуда. Мұныда ескерген жөн. Көктемгі көл-көсір суды пайдаланып, жинақтай алмадық. Ал, жазғы ыстықта тамшы су таппай қиыналып жатпасақ болды.
Азаматхан Әміртай