АЯҚ СУ ЖЕТКІЗУ АЯҚСЫЗ ҚАЛДЫ

Нуржан Ахатов Шиелі ауданына әкім болып сайланар алдында Қарғалы елді мекенінің халқымен кездесіп, ауылды аяқ сумен қамтимын деп уәде берген еді. Сол мақсатта «Күркіреуік» каналын қазып, тазартып, бетондай бастаған. Осы жұмыстар біткенше қол қусырып қарап отырмай, “Күркүреуікке” “напоры” күшті бір насос қондырғысын орнатамыз, сосын қарғалылықтар қарық болады деген-ді. Бірақ ауылға бір тамшы су да келмеді.

Неге? Себебі, уран өндіретін компания “ҚазАтомпром” пәленбай жылдан бері ауылға су жеткізіп тұрған, әжептеуір тарихы бар каналдың бойында “зерттеу жүргіземіз” деп, су арнасының көзін бітеп, елді несібесінен айырған. Ал оның орнына жаңадан канал қазып, бетондап береміз деген уәделері әзірге уәде күйінде қалып отыр. Мұндай шешім кезінде қалай қабылданған? Неге әуелі елді мекеннің бақша, егініне баратын баламалы су арнасын дайындап алмаған? Халықтың емес, қазба байлықты өндіретін компанияның ығына жығылып, иіліп төсек, жайылып жастық болған шенеунік кім? Сұрақ көп. Бұл өз алдына бөлек тақырып, өзекті мәселені алдағы уақытта қаламымызға арқау етерміз.

Бір анығы сол, ауылға су келмеді. Қондырған насостың игілігін ел көре алмады. Оны көшеде ойнап жүрген балаға дейін айтады. Себебі, өзінің әдепкі арнасымен ақпаған соң, канал бетондалып бітпегеннен кейін су жырылған жерлерге жайылып кеткен. Оны әкімнің жауапты замдары да, бөлім басшылары да қадағаламаған. Сөйтіп, ауыл халқының жер еміп, нәпақамызды табамыз деген үкілі үміті әдірам қалды.

Осы жерде заңды сұрақ туындайды. Әкімнің мақсаты не сонда? Анаумен сөйлестім, мынаумен сөйлестім, насос орнаттым деп, елдің көңілін аулап, құрғақ уәдемен «есегін судан өткізу» ме? Әлде халыққа жанашырлықпен қызмет етіп, ауылға шынымен су жеткізкісі келе ме? Олай болса, жұмыс нәтижесімен, уәде орындалуымен құнды емес пе?

Сонымен қатар, әкім сайлауалды кездесуінің бірінде осы ауылдың азаматтарына Қарғалы мен Шиелінің арасын жалғап тұрған паромның тұсына тағы бір насос орнатып берем деген екен. Көктем болса келді. Олар бұл уәдесі де сөз күйінде қалып қоймай ма деп алаңдап, дызақтап отыр.

Егер Ахатовтың айтқандары (немесе тұрғындардың осы екі талап-тілегі) әлдебір әкімдер мен депутаттардың сайлауалды сылдыр сөзіндей болмаса, ауылдағы ағайын оны төбесіне көтеріп, жатса-тұрса тілеуін тілейді. Ауылда “өкіметтің” жұмысы бәріне бірдей жетпейтінін ескерсек, аудан басшысы жерден несібесін тергісі келетін еңбеккерлердің билікке деген сеніміне селкеу түсірмейді деп үміттенеміз.