Мәжіліс депутаты Ермұрат Бапи Киевтің Мәскеудегі парадқа қатысқан елдерге жариялаған демаршы Қазақстан мен Украина арасындағы қарым-қатынасқа кері әсер етпейді деп санайды. Бұл туралы Baimedia.kz хабарлайды.
Қазақстандықтар бірнеше жылдан бері Украинаға гуманитарлық көмек көрсетіп келеді. Сондықтан депутаттың пікірінше, Қазақстан билік өкілдерінің Мәскеудегі парадқа қатысуы Астана мен Киев арасындағы қарым-қатынасқа кері әсерін тигізбейді.
«Украина — өзі тәуелсіз мемлекет, оның өз еркі бар. Демарш жариялай ма, басқа әрекетке бара ма — ол соғыс жағдайындағы ел. Әрине, сондай ашулы, сондай қайғы-қасірет шегіп жатқан, соғыстың отында отырған ел. Сондықтан бұл эмоцияға бағытталған шешім шығар. Бірақ ол демарштың бізге көп әсері бола қоймас. Демарш деген дүние – өзі бір құжатпен немесе әлдебір халықаралық нотамен реттелетін дүние емес. Өздерінің саяси мәлімдемесін жасады деп ойлаймын. Бізде Украинамен қарым-қатынас жалпы жаман емес, біздің қоғамның да қатынасы жаман емес. Соңғы 2-3 жылда біздің қоғам қаншама гуманитарлық көмек жіберді, өзім де соған араластым», — деді депутат.
Сондай-ақ ол Қазақстан мен Ресейдің тығыз экономикалық әрі географиялық байланысы бар екенін айтып, мұндай жағдайда екі ел арасында түсініспеушілікке жол беруге болмайтынын атап өтті.
«Біз Ресеймен кіндігіміз байланып қалған елміз ғой. Оны мойындауымыз керек. 7,5 мың шақырым шекарамыз бар, логистиканың көбі Ресей арқылы өтеді, мұнайдың 80 пайызы Ресей арқылы ағады. Осындай жағдайда біз кикілжіңге баратындай қандай мүмкіндігіміз бар? Бізге бұл қажет емес деп ойлаймын. Себебі біздің бюджеттің орасан зор мөлшерін қамтамасыз ететін мұнай құбыры Ресей арқылы өтеді. Сондықтан қалай болғанда да Ресеймен тіл табысып, жұмыс істеуіміз керек деп ойлаймын», — деп сөзін қорытындылады Бапи.
9 мамырда Украина Сыртқы істер министрлігіне Мәскеудегі әскери парадқа жоғары лауазымды тұлғалары қатысқан мемлекеттердің дипломатиялық миссия басшылары шақырылды. Оларға ресми наразылық жарияланды. Украина сыртқы істер министрінің бірінші орынбасары Сергей Кислица агрессор мемлекеттің парадына шетелдік жоғары лауазымды өкілдердің қатысуын достыққа жатпайтын қадам ретінде бағалайтынын айтты.