Шымкент. 13 тамыз. /Нұргүл Ерғалиқызы/ BM.KZ – Шымкентте қала әкімінің орынбасары Руслан Берденовке жасалған қастандық бойынша сот процесі өтіп жатыр. Бұл жолы сотқа куә ретінде әкімдік қызметкері мен Руслан Берденовтің көмекшісі келді.
Іске қатысушы прокурорлар куәлерден кезектеп жауап алды. Олардың бірі күдікті Ернар Жиенбайдың ара-қатынасына қатысты және жұмыстан босатылуына байланысты жауап берді.
«Басқарма басшысының орынбасары Ердәулет Әжібаев «Ернар Жиенбай өз өтінішін жазып, жұмыстан шығу керек» деген болатын. Осыған орай, «хабарласып біл» деді. Мен хабарластым. Ол кісі «бір ай уақыт берген еді ғой» деді. Мен басшыдан не себепті екенін сұрамадым», – дейді қалалық құрылыс нысандары мониторингі бөлімінің басшысы Аманғали Кенжебеков.
Жәбірленушінің адвокаты куә ретінде келген Талап Рахымбердиевке сотталушының дөрекі мінезіне қатысты сұрақ қойды.
«Бірінші хабарласқанда, сыпайы сөйлеген болатын. Екінші хабарласқанда, дөрекі болды. «Русланға берші телефонды» деді. Ішіп алған адам секілді көрінді», – дейді Берденовтің көмекшісі.
Сондай-ақ, сотталушының қорғаушылары куәгерден істің мән-жайын сұраған еді. Талап Рахымбердиевтің сөзінше, Ернар Жиенбай оқиға болардан бірер күн бұрын «өлемін, не өлтіремін» деген.
Айта кетейік, өткен сот отырысында Жиенбай қастандықтың негізгі себебі қызғаныш, ар-ұждан мен намысы екенін айтқан болатын.
Алайда ауруханада сот барысын мұқият бақылап жатқан Берденов оның бұл мәлімдемесін «қысым мен бопсалаудың амалы» деп, оны соңғы рет оқ атылған күні ғана көргенін, содан бері байланыс болмағанын мәлімдеген.
Жалпы, үшінші мегаполис басшысының орынбасары, кәсіпкер Руслан Берденовті атып кеткен жағдайға байланысты іс сот қарауына 23 шілдеде түсті.