Шымкент. 6 тамыз. /Әсел Мәдәліқызы/ BM.KZ – Қазіргі таңда денсаулығына байланысты оңалту кезеңінен өтіп жатқан жәбірленуші Берденов сот процесіне жеке қатыса алмайтынын әлеуметтік желіде мәлімдеді. Ол сөзінде сот барысын және оған қатысты ақпараттық ахуалды мұқият бақылап отырғанын жеткізді.
Оның сөзінше, айыпталушы Жиембай тарапынан айтылған мәлімдемелер – қысым мен бопсалаудың амалы. Шенеунік соңғы рет жауапкерді оқ атылған күні ғана көргенін, содан бері байланыс болмағанын айтты.
Жазбада Руслан Берденов қала әкіміне қатысты тараған жалған ақпараттарды да теріске шығарды. Жиембайдың әйеліне қатысты айқан сөзді ол «өрескел манипуляция» екенін жазды.
«Сотта жауапкер Жиенбай тарапынан айтылып жатқан мәлімдемелерге үнсіз қалу мүмкін емес. Бұл тек қана шантаж және қысым көрсету әрекеті. Бүгінде бұл жалған мәлімдемелерге қала әкіміне қатысты тұстарды да қосып жатыр. Бұл тағы да істің ақиқатқа емес, қысым көрсету мен беделге нұқсан келтіруге бағытталған өрескел манипуляция екенін дәлелдейді. Мен мұндай мәлімдемелерді үзілді-кесілді жоққа шығарамын және оларды мойындамаймын», — деген Берденов әлеуметтік желідегі хабарламасында.
Шымкент қаласы әкімінің орынбасарының айтуынша, Жиенбай өз өкілдері арқылы келісімге келуге де тырысан. Тіпті, «достасу» ұсынысын жасаған көрінеді. Ал бас тартқан жағдайда «ақпараттық шабуыл» ұйымдастыратынын ескерткен. Сонымен қатар, айыпталушының әкесі өзін-өзі өртейді деген мәлімдеме жасауды жоспарлап, қысым көрсеткенін мәлімдеді.
«Бастапқы ұстанымым өзгерген жоқ. Қақтығыстың түп-төркіні — кәсіби, қызметтік сипатта. Жауапкер келісім аясындағы жұмысын адал атқарғысы келмеді, есеп беруден жалтарды. Мен тек ашықтық пен міндеттемелердің орындалуын талап еттім. Ал қоғам назарын «қызғаныш», «жеке қатынас», «жұбайы» секілді жалған себептерге бұру — манипуляция, шындықтан алыстату. Мен оның жұбайын да, отбасын да танымаймын. Ол мен үшін тек мердігер болатын», — дейді Руслан Берденов.
Ал Шымкент қаласы әкімінің орынбасары Сәрсен Құранбек бүгінгі брифингте Руслан Берденовтің қызметте қалу-қалмауы – оның жеке қалауына байланысты шешілетін мәселе екенін жеткізді.
«Азаматтың белгілі бір лауазымда жұмыс істеуі – оның өз қалауына байланысты. Мен әріптестерімнің қандай да бір шешімін немесе ойын түсіндіре алмаймын. Ол – олардың және жоғары тұрған органдардың құзырындағы мәселе. Ол кісі қызметте қалғысы келе ме, әлде кеткісі келе ме – бұл денсаулығына да байланысты болуы мүмкін. Мен бұл тақырыпты онымен талқылаған жоқпын, сондықтан пікір білдіре алмаймын», — дейді ол.
Айта кетейік, бүгін сот залында айыпталушы Ернар Жиембай қылмыстық іс отбасылық жайттан басталғанын жеткізген еді. Оның сөзінше, жәбірленуші әйеліне әлеуметтік желіде «сен әдемісің» деп жазған. Ал кейін арнайы кабинетіне шақырып ары мен намысына тиетін сөз айтып, қызметтен кетуін талап еткен көрінеді.
Ал қала әкімінің орынбасарына қатысты қастандық әрекеті 21 сәуір күні әкімдік ғимараты алдында болған.