Наурыз мерекесінің беделі жоқ па?
Сонау 80 жылдардан бері тойланып келе жатқан «Наурыз» мейрамы Қазақстанда жалпыұлттық сипат ала алмағаны артық айтқандық емес. Наурызды «аш адамға нан бергендей палау мен концерт, киіз үйде отырып ет жеу мен ішу» деп түсінетін шенеуніктеріміз аз емес. Жалпы наурыз мейрамы бұл ұлттық мейрам. Оның артында терең философия мен идеология жатыр. Барлық шығыс елдері тойлайтын наурыздың үлкен қалалар мен облыстарда Президент немесе әкім қатысатын болғандықтан жоғары деңгейде дайындалса аудан, ауылдарда әйтеуір «өткізе салудың» амалын қарастырады. Мысалға, жаңа жылға 200 млн тенге қаражат бөлген Павлодар облысының әкімдігі наурызға бір тиын да бөлмепті. Бұл туралы белгілі блогер Оңғар Қабден өзінің телеграмм арнасында айтты. Осындай үрдіс барлық аудандар да сақталған. Әсіресе солтүстік өңірлердің әкімдіктері наурызға бөлінетін қаражатқа келгенде кежегелері кейін тартып қалатыны өтірік емес. Кеше ғана «Тәуекел» ұйымының төрағасы Бұрахан Даханов хабарласып, Солтүстік Қазақстан облысы әкімдігінің орталық алаңда жоспарланған наурыз мейрамына қолдау көрсетпей жатқанын айтып қынжылды. Наурыз халықтың мейрамы. Әкім қараның мейрамы емес. Керісінше құрақ ұшып, қарттар мен көпбалалы аналарға, жетімдер мен жесірлерге, мүмкіндігі шектеулі жандарға қайырымдылық көрсететін мереке. Төл мерекемізді төрге шығармай, қазақи болмасымыз бен салт-санамызды қадірлемей, өскелең ұрпаққа өнеге бере алуымыз екіталай.
Асылбек Байжұмаұлы