Астана. 19 желтоқсан. BM.KZ — Жетісу облысы Бақтыбай ауылындағы мәдениет үйі күрделі жөндеуге жабылып, әлі күнге пайдалануға берілмеген. Қаржы мониторингі агенттігінің облыстағы департаменті бюджет қаражатын жымқыру фактісі бойынша тергеу жүргізіп жатыр.
ҚМА Жетісу облысы бойынша департаменті мәліметінше, 2020 жылы Ескелді ауданының ішкі саясат бөлімі мен мердігер ұйым арасында күрделі жөндеуден өткізуге 753 млн теңге сомасына шарт жасалған.
Шарт талаптарына сәйкес мердігер жұмысты 2021 жылдың желтоқсан айында аяқтауға тиіс болған, алайда нысан осы уақытқа дейін пайдалануға берілмеген.
Тергеу барысында бұрын қабылданып, төлем жүргізілген бірқатар жұмыстың нақты орындалмағаны анықталды.
Нәтижесінде мемлекетке келтірілген залал 212 млн теңгеден асты. Қатысы бар тұлғалардың мүлкіне шектеулер қойылды. Тергеу әлі жүріп жатыр.
Қазақстан Республикасы Қылмыстық процестік кодекстің 201-бабына сәйкес ҚМА өкілдері өзге ақпаратты жария етпеді.