Астана. 7 тамыз. /Нұргүл Ерғалиқызы/ BM.KZ – Шымкент қаласының қылмыстық істер жөніндегі мамандандырылған ауданаралық сотында №2 мамандандырылған халыққа қызмет көрсету орталығының 15 қызметкеріне қатысты қылмыстық іс бойынша алдын ала тыңдау өтті. Іс барысында 13 сотталушы сотқа бұлтартпау шарасын өзгерту туралы өтініш білдірді. Олар үйқамаққа шығуды сұрады. Себебі, күдікті азаматтардың бірінің денсаулығы нашарлаған. Енді бірі отбасылық жағдайын алға тартса, кейбірі асырауындағы адамдарға қарау қажеттілігі туындағанын жеткізген.
Алайда, сот айыпталушылардың өтініштерін тыңғылықты қарап, дәлелдер мен медициналық қорытындыларды назарға алды. Сонымен қатар, ауыр және аса ауыр қылмыстарды алдын ала сөз байласып, адамдар тобы болып жасады деп күдіктелгендері ескеріліп, сотталушылар үйқамаққа жіберілмейтін болды.
«Қатысты күзетпен ұстау түріндегі бұлтартпау шарасын өзгертіп, үйқамақ түріндегі бұлтартпау шарасына өткізу туралы талап тілегін қарап, анықтады. Сот іске қатысушылардың пікірін тыңдап, іс материалдарын зерттеп, адвокаттардың талап-тілектері төмендегідей жағдайда қанағаттандырусыз қалдыруға жатады деп есептейді. Мурашиловтың КУИС-ке қарасты 63 мекемесіне арнайы медицина мекемесі қадағалайды. Алайда аталған мекеменің әкімшілігінен Мурашиловтың денсаулығына байланысты бұлтартпау шарасы қажеттілігі туралы ұсыныстар түскен жоқ», – деді Шымкент қалалық қылмыстық істер жөніндегі мамандандырылған ауданаралық сотының судьясы Самидин Темірәлиев.
Айта кетейік, сотталушыларға Қылмыстық кодекстің бірнеше бабы бойынша айып тағылған. Нақтырақ айтар болсақ, «Заңсыз сыйақы алу», «Қылмыстық жолмен алынған ақшаны немесе өзге мүлікті заңдастыру», сондай-ақ «Ұйымдасқан топ, қылмыстық ұйым құру және оған қатысу» баптары бар.
Естеріңізге сала кетейік, Шымкент қаласында 2023-2024 жылдары №2 мамандандырылған ХҚКО басшылығы мен қызметкерлері теориялық және практикалық емтихандарсыз жүргізуші куәліктерін рәсімдеуге заңсыз жағдай жасағаны мәлім болған. Олардың қызмет құны 150 мыңнан 400 мың теңгеге дейін жеткен. Нәтижесінде кемінде 500 адам жүргізуші куәлігін заңсыз алып, қылмыстық топтың табысы 150 миллион теңгеден асқан. Тергеу барысында күдіктілердің 200 миллион теңгеден астам мүлкіне тыйым салынып, іс бойынша 15 тұлға айыпталушы деп танылған.