Қазақстанның 110 мектебінде Финляндияның буллингке қарсы бағдарламасын енгізбек, деп хабарлайды агенттіктің тілшісі.
«Бүгінгі таңда білім беру ұйымдарындағы педагог-психологтардың штат санын ұлғайту бойынша шаралар қабылдануда. «Балаларды зорлық-зомбылықтан қорғау, суицидтің алдын алу және олардың құқықтары мен саламаттылығын қамтамасыз ету жөніндегі 2023-2025 жылдарға арналған кешенді жоспар» шеңберінде әрбір 500 білім алушыға бір педагог-психолог бірлігін қамтамасыз ету талабы көзделді», — деп жауап берді Қазақстан Республикасы премьер-министрінің орынбасары Тамара Дүйсенова депутаттық сауалға.
Оның айтуынша, «Білім туралы» заңға басқару, әкімшілік және көмекші персоналдың бекітілген штат санының лимиті және көзделген қаражат шегінде бірінші басшылардың қаржы жылы ішінде бір реттен артық емес штат саны мен штат кестесін өзгертуіне мүмкіндік беру жөнінде толықтырулар енгізілді.
«Қазіргі таңда 9552 білім беру ұйымында (5371 мектепте, 3526 балабақшада, 655 колледжде) педагог-психологтардың штат бірліктерінің саны жаңа талаптарға сәйкес келтірілді, 2492 мектепте жұмыс жүргізілуде», — деді ол.
Психолог мамандығына бөлінген грант саны және білім сапасының мазмұны туралы ол, ұлттық білім беру деректер қорының ақпараты бойынша мектептердегі педагог-психологтарға қажеттілік 229-ды, мектепке дейінгі ұйымдарда 2029-ды құрайды деді.
«Педагогика және психология», «Психология» мамандығы бойынша 36 жоғары оқу орны даярлайды. 2023-2024 оқу жылында 8723 мемлекеттік грант бөлінді, оның ішінде «Педагогика және психология» мамандығы бойынша 6702 – бакалавриат, 1512 – магистратура, 267 – докторантура, «Психология» мамандығы бойынша 230 – бакалавриат, 12 – магистратура бағдарламаларына, деп мәлімдеді үкімет басшысының орынбасары.
Сонымен қатар, вице-премьер «Педагогика және психология», «Психология» мамандықтары бойынша білім беру бағдарламаларының мазмұнын медициналық жоғары оқу орындарының өкілдері бірлесіп жаңартып, өзектендіргенін, оның ішінде «Суицидтік мінез-құлық психологиясы», «Суицидология және дағдарыстық психология», «Девиантты мінез-құлық психологиясы», «Психологиялық көмек», «Дағдарыстық психотерапия және суицидология», «Психологиялық кеңес беру негіздері», «Патопсихология негіздері» пәндері заманауи ғылыми-практикалық мазмұнда, тәжірибеде қолданылатын тәсілдер ескеріле отырып жаңартылғанын айтты.
Дүйсенованың мәліметінше, білім беру ұйымдарында педагог-психологтарға әдістемелік қолдау және балалар мен ата-аналарға психологиялық кеңес беру мақсатында өңірлерде 12 психологиялық қолдау орталығы ашылды және 2024 жылдың соңына дейін сегіз психологиялық қолдау орталықтарын ашу (Жамбыл, Манғыстау, Түркістан, Жетісу, Ұлытау, Абай, Батыс Қазақстан облыстары, Шымкент қаласы) көзделіп отыр.
Вице-премьердің айтуынша, педагог-психологтар жүргізетін міндетті құжаттардың тізбесіне өзгертулер енгізіліп, жүктемесі азайтылды, қазіргі таңда олар тек екі құжат жүргізуі тиіс (жұмыс жоспары, кеңес беруді тіркеу журналы). 2023-2024 оқу жылына арналған әдістемелік-нұсқаулық хатқа сәйкес жылына кемінде төрт сағат сынып жетекшісі мен педагог-психолог әр сыныппен бірлескен сынып сағаттарын жүзеге асыруда.
«Кешенді жоспар аясында 110 мектепте пилот ретінде Финляндияның буллингке қарсы «Kiva» бағдарламасын енгізу жоспарлануда. «Назарбаев зияткерлік мектептері» ДББҰ базасында бес халықаралық сертификатталған жаттықтырушы даярланды, сегіз мыңға жуық педагог және бағдарламаның 332 үйлестірушісі оқытылатын болады. Жаңа оқу жылынан бастап пилоттық режимде мектептерге енгізілетін осы бағдарлама аясында педагог-психологтың әрбір сыныппен буллингке қарсы тоқсан сайын бір сағаттан сабақтар өткізуі енгізілетін болады», — деп хабарлады Дүйсенова.
Педагог-психологтың мәртебесі, олардың жалақысы туралы, 2019 жылдан бастап «Педагог мәртебесі» туралы заңына сәйкес психологтардың заңды мәртебесі анықталып, мұғалімдермен теңестірілгенін айтты.
Осыған орай, орта білім беру ұйымдарындағы педагог-психологтың жалақысы еңбекақы төлеу жүйесі туралы қаулыға сәйкес реттеледі, 2020 жылдан бастап лауазымдық жалақыға ұлғайту коэффициенттерін қолдану жолымен жалақы жоспары ұлғайтылды, 2023 жылғы қаңтардан бастап жалақыны арттыру 100% құрады, деді ол.
Сонымен қатар, педагогтерді аттестаттау қағидаларына сәйкес, педагог-психологтардың кәсіби біліктілік санаттарын көтерген жағдайда 30%-дан 50%-ға дейін жалақының ұлғаюы көзделгенін атап өтті.
Білім беру жүйесінен басқа да салалардағы психологиялық қызметтердің жұмысы туралы ол:
«Психикалық денсаулық саласында халыққа медициналық-әлеуметтік көмек көрсетуді ұйымдастыру стандартқа сәйкес жүзеге асырылады. Төтенше жағдайлар аймағындағы халыққа шұғыл медициналық және психологиялық көмек көрсету, психологтардың қызметін регламенттеу және азаматтық қорғау органдарының жеке құрамымен психологиялық жұмысты ұйымдастыру жөнінде тиісті нормативтік құқықтық актілер қабылданған. Табиғи және техногендік сипаттағы төтенше жағдайлар кезінде халыққа (оның ішінде азаматтық қорғау органдарының қызметкерлеріне) шұғыл психологиялық көмек көрсету туралы қағидалары әзірленді», — деп жауап берді.
«Сонымен қатар, қазіргі уақытта мәжіліс парламентінің депутаттарымен бірлесіп халыққа кәсіби психологиялық көмек көрсету мәселесін реттеу бойынша заңнамалық бастама пысықталуда. «Қазақстан психологтерінің Әдеп кодексі» және «Психологиялық көмек туралы» заң жобасының тұжырымдамалық негіздері әзірленуде», — деп хабарлады премьер-министрдің орынбасары.
Фото көзі: admmegion.ru