САНАНЫ СЕРПІЛТКЕН СЕМИНАР

«Ізденген жетер мұратқа» демекші, білім деңгейіңді көтеру қай жаста болсаң да артықтық етпейді. Ақпанның алғашқы күндері Астанада «Байтақ» партиясы өңірлердегі барлық деңгейдегі депутаттардың басын қосып, «Әділетті Қазақстан және Жасыл идеология» атты семинар өткізді. Бұл коммуникациялық бірегей жоба экологиялық саясат, мемлекеттік басқару және тұрақты даму саласындағы көшбасшыларды даярлауға арналған. Партия төрағасы Азаматхан Амиртаевтың семинарды ашқан кездегі сөзі экологиялық айыппұлдардың, қоршаған ортаға эмиссияларды есептеудің, аталған бағыттар бойынша салық түсімдерінің және олардың пайдаланылуын бақылаудың маңызды мәселелеріне арналды.

Семинар қоршаған орта мәселелері мен және тұрақты қоғамды дамытумен, түрлі салаларды реформалаумен, климаттық күн тәртібімен, ESG қағидаттарын енгізумен айналысатын партиялардың, мемлекеттік құрылымдардың және үкіметтік емес ұйымдардың жұмысын білу, түрлі мәселелерді шешуде жаңа ықтимал тәсілдер мен стратегияларды жақсы түсінуге таптырмас мүмкіндік берді.

«Мәслихаттардың рөлі мен әлеуетін күшейтудегі Жасыл идеологияның орны» тақырыбында баяндама жасаған Еуропа жаратылыстану ғылымдары академиясының академигі Досмұхамет Нұр-Ахметтің әр сөзі салмақты, бүгінгі таңда экологиялық саясаттың жұмысын тереңірек білу, зияткерлік әлеуетті дамыту және жергілікті жерлерде жүзеге асыруға жаңа идеялар мен тұжырымдамалар енгізуге көмектесетіні сөзсіз.

Философия ғылымдарының докторы, ҚР Жоғары Соты жанындағы «Сот төрелігі академиясының» профессоры Төлеуғали Бурбаев «Сыни тұрғыдан ойлау экологиялық мәселелерді әділетті шешудің маңызды құралы» тақырыбында баяндама жасап, саяси басқарудың теориялық және практикалық аспектілеріне, экологиялық саясаттың құқықтық және экономикалық негіздеріне тоқталды. Сыни ойлау қабілеті, өзіңе деген сенімділікті қалыптастыру тұрғысында жан-жақты баяндап берді.

Президент Қасым-Жомарт Тоқаев Дубайда өткен Дүниежүзілік климат саммитінде Қазақстанның жеке «жасыл» бастамаларды белсенді қолдайтынын айтып, қоршаған ортаны қорғауға үлес қосып, пластик қалдықтарынан арылу жобаларымен жұмыс істеп жатқан отандық Қаптама қауымдастығын мысалға келтірген еді. Сонымен қатар, метан шығарындыларын азайту жаһандық жылыну қарқынын бәсеңдетудің ең жылдам жолы екендігін, Қазақстанның метан шығарындыларын азайту жөніндегі жаһандық міндеттемеге қосылу туралы шешімін жариялаған болатын.