Партия жетекшілерінің бірі — атқарушы хатшы Нұрлан Көптілеуов қызметінен кетті. Оның орнына бұл жауапты қызметке Әлібек Қуаныш тағайындалды. Ол — жастар саясаты, қоғамдық жұмыстар мен экология саласында мол тәжірибесі бар кәсіби маман.
Нұрлан Көптілеуов BAYTAQ партиясының құрылтай съезінен бастап төраға Азаматхан Әміртаевпен бірге белсене жұмыс істеді. Бұл — партия тарихындағы атқарушы хатшының алғаш рет ауысуы. Көптілеуов енді медиа саласына ауысып, жаңадан құрылған, болашағы зор BAIMEDIA медиахолдингінің бас директоры болып тағайындалды.
Көптілеуов аймақтық филиалдардың жұмысын үйлестіріп, экология мәселелерін алға тартатын науқандарды басқарды. Сонымен қатар үкіметтік емес ұйымдармен және бұқаралық ақпарат құралдарымен байланыс орнатуға, партия ішіндегі коммуникация мен басқару жүйесін қалыптастыруға атсалысты.
«Бұл кадрлық өзгеріс партия жұмысының тиімділігін арттырып, басқару жүйесін нығайтуға, сондай-ақ экологиялық күн тәртібін одан әрі ілгерілетуге ықпал етеді деп күтілуде. Жаңа қызметінде табыс пен сәттілік тілейміз», — деді төраға Азаматхан Әміртаев.
Ал BAIMEDIA ұжымы Нұрлан Көптілеуовтің келуі медиахолдингтің нарықтағы орнын күшейтіп, мазмұн мен цифрлық платформаларды дамытуға жаңа серпін береді деп күтуде.