Ұлыбританияда Болгарияның алты азаматы Ресейдің пайдасына тыңшылық жасады деген айыппен 5 жылдан 10 жылға дейін бас бостандығынан айырылды, деп хабарлайды Baimedia.kz.
Патшалық прокуратура қызметінің мәліметінше, Орлин Русев басқаратын топ ресейлік тапсырыс берушілерді қызықтыратын адамдар мен нысандар туралы ақпарат жинаумен айналысқан. Солардың қатарында Атырау облысының бұрынғы әкімі Бергей Рысқалиев те болған.
«Олар Рысқалиевпен байланысты болуы мүмкін орындарда кезекшілік атқарып, сол мекенжайларға кіру жолдарын зерттеген. Стоянов Лондонда Рысқалиевтің резиденциясы жанында автокөлікте отырып бақылау жүргізіп жатқан кезде, оның екі көмекшісі оны бейнежазбаға түсіріп алған. Олар не істеп жүргенін сұрағанда, ол өзін жақын маңдағы аурухананың қызметкері ретінде таныстырған. Кейін бұл сөзін дәлелдеу үшін көлігіне Ұлттық денсаулық сақтау қызметінің логотипі бар тақтайша қойған», — делінген мәлімдемеде.
Бұдан бөлек, тыңшылар 2022 жылғы қыркүйекте Қазақстан елшілігінің алдында арандату ұйымдастыруды жоспарлаған. Прокуратураның дерегінше, олар қолдан жасалған шошқа қанын пайдаланып, «оппозициялық митингті» қолдан ұйымдастырмақ болған. Сондағы мақсаттары — жалған оппозициялық топ құрып, ол туралы ақпаратты ресейлік құрылымдар арқылы Қазақстанның арнайы қызметіне жеткізу. Осы арқылы ресейлік кураторлардың Қазақстан алдындағы беделін арттырмақ болған.