Еңбек адамы дегеніміз – көпшілікке көрінбей, тыныш жүріп тірліктің ауырын арқалайтын жан. Олар жайлы жиі айтыла бермейді, бірақ солардың арқасында күнделікті жұмыс алға жылжиды. Сол жандардың бірі – он жылдан бері көлік жүргізіп келе жатқан Амурбек Молдыбаев.
Ол – Бурабайдың әр бұрылысын, әр белесін жаттап алған адам. Туристік маусымның ыстығы мен суығында, қысы-жазы жолда жүріп, курорт өмірінің ажырамас бөлігіне айналды.
– Туристер Бурабайға алғаш рет келгенде алдымен мені көреді. Менің көлік жүргізу мәнерім мен оларға жасаған қарым-қатынасым алғашқы әсеріне тікелей ықпал етеді, – дейді А.Молдыбаев.
Ол осы он жылда мыңдаған туристі қарсы алып, талай шақырым жол жүріп, сансыз алғыс естіді. Арасында шетелдіктер де жетеді. Кейде сөзсіз де түсінетін деңгейге жеткенін өзі әзілмен айтады.
Ұқыптылығы мен тәртіпке беріктігі арқасында қарапайым жүргізушіден көлік жөндеуге жауапты маман деңгейіне көтерілді. Қазір ол – автокөлік инженері. Бұл – тек кәсіби өсудің емес, еңбекке деген адалдықтың жемісі.
Амурбек Молдыбаев – қажырлы еңбегімен туризм саласын алға сүйреп жүрген жандардың бірі. Бурабайдың келбеті тек табиғатпен емес, осындай адамдармен де қалыптасады.