Астана төрінде Қалибек Қуанышбаев атындағы Қазақ ұлттық музыкалық драма театры көрермендерге ерекше қойылым – «Күй» спектаклінің премьерасын ұсынды. Спектакльдің негізіне Қазақстанның Еңбек Ері, көрнекті мемлекет және қоғам қайраткері, Халық жазушысы Әбіш Кекілбаевтың терең мазмұнды «Күй» повесі арқау болды.
ҚР Мәдениет және ақпарат министрлігінің хабарлауынша, классикалық прозаның сахналық шешімі өзгеше көркемдік тәсілмен жүзеге асқан. Театр труппасы автордың философиялық әрі психологиялық иірімдерге толы шығармасын жаңа интерпретациямен сахна төріне шығарды. Қойылым барысында көрермендер қазақтың төл өнерімен де сусындады – спектакль халық аспаптар ансамблінің тірі музыкалық сүймелдеуімен өтті. Бұл көркемдік шешім қойылымға ерекше әр беріп, ұлттық реңкті күшейте түсті.
Спектакльдің өзегінде – басты кейіпкер Жөнейіттің ішкі арпалысы, тағдырмен тайталасқан жан күйзелісі, билік пен ар-ождан арасындағы қақтығыс жатыр. Адам жанындағы күйік пен кектің, ар мен намыстың күресі актерлік шеберліктің биік үлгісімен беріліп, көрерменнің жүрегіне жол тартты.
Театр сахнасындағы бұл қойылым тек өнер туындысы ғана емес, ұлттық рухты ұлықтаған, ұлы жазушының қаламынан туған терең философиялық ойды сахналық тілмен жеткізген ерекше мәдени оқиғаға айналды. Залдағылар қазақ драматургиясының, прозасы мен музыкасының тұтастығын сезініп, ерекше рухани әсерге бөленді.