Перизат Қайрат сот залында күтпеген мәлімдеме жасады. Ол өзіне тағылған миллиондаған қаржы жымқыру айыбына қатысты кінәні «Нұр Отан» партиясы мен Бауыржан Байбекке бағыттады.
Перизаттың сөзінше, қазір дау тудырып отырған қор – Biz Birgemiz Qazaqstan 2030 – жеке бастамамен емес, тікелей партияның қолдауымен құрылған.
«Мені және анамды жалған қол қойды, қор ашты деп кінәлап жатыр. Бірақ шын мәнінде, бұл қор “Нұр Отан” партиясының жанында құрылды. Барлық құрылтайшылар — сол партияның қызметкерлері, тіпті кейбірі әлі де сонда істейді», – деді ол сотта.
Айыптау актісіне сәйкес, Перизат Қайрат 2021 жылы Biz Birgemiz Qazaqstan 2030 қорын ашу үшін жалған құжат жасағаны белгілі болды. Қорды құруға қарсылық келгеніне қарамастан, оны компьютерлік клубтың мекенайына тіркеген көрінеді.
Айта кетейік, сонымен қатар сот барысында Қайрат анасымен бірге 2021 жылдан 2024 жылға дейін қайырымдылық мақсатында жиналған 3 525 924 013 теңгені жымқырғаны анықталды. Оның басым бөлігі су тасқынынан зардап шеккендерге жиналған қаржы. Бұл қаражатқа 7 пәтер, 3 автокөлік, 150 млн теңгеге әшекей-бұйым сатып алған. Сонымен қатар, гүл сататын бизнесін ашып, бір бөлігін жеке шығындарына жұмсап, 17 елге саяхаттаған.