Сәтбаев қаласы әкімдігінің бас маманы қызметтік тәртіпті өрескел бұзғаны үшін жұмыстан шығарылды. Бұл туралы облыстық прокуратура хабарлады.
Анықталғандай, мемлекеттік қызметші «Сыбайлас жемқорлыққа қарсы іс-қимыл туралы» Заң талаптарын жүйелі түрде бұзып, интернет арқылы ұйымдастырылатын құмар ойындарына қатысқан.
Тиісті талдау нәтижесінде оның «1XBET» және «OLIMPBET» секілді букмекерлік кеңселер арқылы 16 миллион теңгеге жуық қаржыны бәс тігуге жұмсағаны белгілі болды.
Құзырлы органның қадағалау актісі негізінде аталған азамат мемлекеттік қызметтен босатылды.
Заңға сәйкес, мемлекеттік қызметшілерге құмар ойындарға және бәс тігуге қатысуға қатаң тыйым салынған.
Бұған дейін, құмар ойындарға ақша салған Орал қаласындағы мемлекеттік қызметкерлер жайлы ақпарат берген едік.