Павлодар облысында инвестор 18 миллион теңге қаржысын өндіріп алды, деп хабарлайды прокуратура.
Павлодар облысының Успен ауданында инвестициялық жобаның жүзеге асуына кедергі болған берешек толық өтелген. Нәтижесінде, жергілікті фермер сүт фермасын салу жобасын қайта жандандырып, 20 жаңа жұмыс орнын ашты.
Бастапқыда «Бик» шаруа қожалығы аудандық прокуратураға жүгініп, сот шешімімен өндіріліп алынуға тиіс 18 миллион теңге көлеміндегі материалдық шығынның өтелмей жатқанын хабарлаған. Бұл қаражат ірі қара мал сатып алуға, яғни ауыл шаруашылығы саласындағы инвестициялық жобаны іске асыруға бөлінген.
Прокуратура кәсіпкердің уәждерін мұқият зерделеп, сот актісінің орындалмауына байланысты Қазақстан Республикасы Қылмыстық кодексінің 430-бабының 3-бөлігі бойынша істі Сотқа дейінгі тергеп-тексеру бірыңғай тізіліміне тіркеді.
Тергеу нәтижесінде берешек толық өтелді.