Түркістан облысы Жетісай аудандық білім бөлімінің 46 қызметкері 4 млрд теңге қазына қаржысын талан-таражға салғаны үшін сотталды. Іс облыстық мамандандырылған қылмыстық істер жөніндегі сотта алқабилердің қатысуымен қаралған.
Сот материалдарына сүйенсек, білім бөлімі басшылары мен мектеп бухгалтерлері 2021–2023 жылдар аралығында жалған қызметкерлерге жалақы аудару арқылы мемлекетке 4 млрд теңгеден астам шығын келтірген. Ақша мектептерде іс жүзінде жұмыс істемеген туыстары мен таныстарының есепшотына аударылып отырған.
Кімдерге қандай айып тағылды?
Тергеу мәліметінше:
Бөлім басшыларының бірі М. аса ірі көлемде сеніп тапсырылған мүлікті иемдену (ҚК 189-бап) бабы бойынша,
Ал тағы 1 басшы Ш. – аталған баппен қатар, аса ірі көлемде пара беруге айдап салу (ҚК 367-бап) бойынша да айыпталған.
Сонымен қатар, бөлімнің бас бухгалтері Ш.-ға 189-баппен қатар ақшаны заңдастыру бабы да қосылған.
Қалған 43 мектеп бухгалтеріне — аса ірі көлемде сеніп
тапсырылған мүлікті иемдену бабы бойынша айып тағылған.
Сот үкімі қандай болды?
«Негізгі сотталушы Ш. мен М.-ға тиісінше 9-жыл және 10 жыл бас бостандығынан айыру түріндегі жаза тағайындалды. ҚК-нің 74-бабының талаптарына сәйкес, Ш.-ның кәмелетке толмаған баласының болуына байланысты, жазаның өтеу мерзімі 5 жылға кейінге қалдырылды. 34 сотталушыға ҚК-нің 189-бабының 4-бөлігінің 2-тармағымен жалпы 5 жылдан 8 жылға дейін мерзімге бас бостандығынан айыру түріндегі жаза тағайындалды», — дейді Түркістан облыстық сотының баспасөз қызметі.
Сот кінәлі деп танылғандардың көпшілігінің отбасылық және әлеуметтік жағдайын (жүктілік, жас балаларының болуы, алғаш рет сотталуы) жеңілдететін мән-жай ретінде қарастырды. Алайда негізгі айыпталушылар — бөлім басшылары М. мен Ш.-ның қызметтік антына опасыздық жасағаны ауырлататын жағдай деп танылды.
Нәтижесінде:
Бөлім басшылары М. мен Ш. тиісінше 10 және 9 жылға бас бостандығынан айырылды. Ш.-ның жазасы кәмелетке толмаған балаларына байланысты 5 жылға кейінге қалдырылды.
34 адам 5 жылдан 8 жылға дейін түрме жазасына кесілді. Оның ішінде:
4 адамға жаза кейінге шегерілді,
18 адамға шартты жаза берілді,
12-сі нақты бас бостандығынан айырылды.
8 адам 1 жылдан 3 жылға дейін бостандығын шектеу жазасын алды.
2 адамның іс-әрекеті қайта сараланып, олар 1 жылға бостандығын шектеу жазасына кесілді.
Айта кетейік, 43 бухгалтер мемлекетке 800 млн теңгеден астам қаражатты қайтарған. Ал қалған шығынды өтеу мәселесі азаматтық сот тәртібімен шешілмек.
Сот үкімі әлі заңды күшіне енген жоқ.