Астана. 25 шілде. BM.KZ – Бүгін Перизат Қайрат пен оның анасы Ғайни Алашбаеваға қатысты сот үкімі жарияланды. Перизат Қайрат 10 жылға, ал оның анасы 7 жылға бас бостандығынан айырылды.
«Перизат Қайратты Қылмыстық кодекстің 218-бабы 3-бөлігінің 3-тармағында көзделген қылмысты жасағаны үшін кінәлі деп тану және оған 7 жыл мерзімге мүлкін тәркілей отырып бас бостандығынан айыру жазасын тағайындалсын. Қылмыстық кодекстің 58-бабы 3-бөлігіне сәйкес, бірнеше қылмыстық құқықбұзушылық бойынша жазаларды ішінара қосу жолымен Қайратқа түпкілікті жаза ретінде 10 жыл мерзімге бас бостандығынан айыру, сонымен қатар 10 жыл бойы қайырымдылық көмек жинауға байланысты қайырымдылық қызметпен айналысу құқығынан айыру жазасы тағайындалсын. Жаза орташа қауіпсіздік мекемесінде өтеледі. Қылмыстық кодекстің 49-бабы 2-бөлігіне сәйкес, Қайратты Қазақстан Республикасының «Шапағат» мемлекеттік наградасынан айыру туралы ұсыныс Қазақстан Президентіне жолдансын», — деп үкім етті судья Сабыржан Каримов.
Оның анасы Ғайни Алашбаеваның жеңіл жолмен иемденген қаржыға сатып алған мүлкі тәркілене отырып, 7 жылға бас бостандығынан айырылды.
Сот шешіміне сәйкес, тәркіленген мүлікті сату арқылы түскен қаражат жәбірленушілерге беріледі.
Бұған дейін жарыссөз кезеңінде жәбірленушілердің көбі сөз алып, өз пікірін білдірген еді. Барлығы дерлік судьядан екі айыпталушыға да ең қатаң жаза тағайындауды сұраған. Олардың айтуынша, халық арасында «белдемше киген Остап Бендер» аталып кеткен Перизат пен оның анасы қоғамдық институттарға деген сенімді селкеу салған.
«Кейбір жәбірленушілер олардың жасы мен денсаулығына байланысты жеңілдік жасау керек деген пікір айтты. Бірақ менің ойымша, мұндай әрекеттерді түбегейлі тоқтату керек. Ешқандай жасына немесе ауруына қарамай, жазаны өзгеріссіз қалдыру керек», — деді жәбірленуші Руслан Томашев.
Айта кетейік, 24 шілдедегі сот отырысы тағы да жабық режимде өтті. Сонымен қатар, айыпталушылар соңғы сөздерін жария етпеуді жөн көрді.
Кеше сот процесіне қатысты пікір білдірген Премьер-Министрдің орынбасары Ермек Қошербаев қайырымдылық қорларын реттеп, бақылауға алу қажеттігін атап өтті. Оның айтуынша, жақын арада үкімет осыған қатысты заңнамаға өзгерістер енгізу жұмыстарын бастайды.
Еске сала кетейік, Перизат Қайрат – Қазақстандағы қоғам белсендісі әрі кәсіпкер. Ол ел арасында 2021 жылы маусымда құрылған қайырымдылық қорының негізін қалаушы және жетекшісі ретінде танымал.
2024 жылдың қараша айында Перизат Қайрат 1,5 миллиард теңгеден астам сомадағы қаражатты жымқырды деген айыппен қамауға алынды. Тергеу мәліметінше, бұл қаржы су тасқынынан зардап шеккендерге көмек ретінде жиналған. Алайда оның бір бөлігі элиталық жылжымайтын мүлік, қымбат көліктер мен шетелдік сапарлар сияқты жеке қажеттіліктерге жұмсалған.
Сондай-ақ, Перизат Қайраттың қор қаржысын қолма-қол ақшаға айналдыру үшін дос-жарандары мен туыстарын араластырғаны, оларға көрсеткен «қызметтері» үшін сыйақы төлегені бегілі болды.
Кейін Қаржылық мониторинг агенттігі Перизат Қайраттың заңсыз әрекеттерінің тағы бір эпизодын анықтағанын мәлімдеді. Ол бұл жолы Палестина халқына гуманитарлық көмек көрсету үшін жиналған қаражатты жымқырды деген күдікке ілінді.
2025 жылдың наурыз айында Астананың мамандандырылған ауданаралық экономикалық соты Перизат Қайрат басқаратын «Biz Birgemiz Qazaqstan 2030» қоғамдық бірлестігін тарату туралы Әділет департаментінің талап-арызын қарап, шешім шығарды.