Жамбыл облысы, 28 шілде. BM.KZ – Жамбыл облысының Мойынқұм ауданында жол-көлік оқиғасы болды, деп хабарлайды Halyqstan телеграм-арнасы.
Алдын ала мәлімет бойынша, UFC лигасында бақ сынайтын танымал спортшы Шавкат Рахмоновтың жары – Гүлайым Рахмонова ұлымен және құрбыларымен бірге Қарағандыдан Алматыға бағыт алған. Олар мінген Toyota Land Cruiser жол талғамайтын көлігі тас жолдың 296-шақырымында, Ақсуек ауылы маңында аударылған көрінеді. Басқару тетігіндегі әйел рөлге ие бола алмай қалған деген болжам бар.
Апат салдарынан көлік ішіндегі 39 жастағы жолаушы З.А. оқиға орнында қаза тапты. Ал 35 жастағы тағы бір жолаушысы А.С. Мойынқұм аудандық ауруханасына барар жолда көз жұмған.
Гүлайым Рахмонова мен 2022 жылы туған ұлы Шу қалалық ауруханасына жеткізіліп, жарақаттарымен травматология бөліміне жатқызылды. Дәрігерлердің айтуынша, олардың жағдайы – орташа ауыр.
«Ота қажет емес. Қазіргі таңда динамикалық бақылауға алынған», – деп мәлімдеді аурухана қызметкерлері.
Аталған факті бойынша полицейлер екі және одан да көп адамның өліміне алып келген жол жүру ережесін бұзу бабымен сотқа дейінгі тергеп-тексеруді бастаған.
Тергеу мүддесіне байланысты басқа мәліметтер әзірге жарияланбай отыр.