Шымкент, 28 шілде. / Әсел Мәдәліқызы/ BM.KZ – Шымкент қаласы әкімінің орынбасары Руслан Берденовке жасалған қастандыққа қатысты алдын ала тыңдау өтті. Іс қалалық қылмыстық істер жөніндегі мамандандырылған ауданаралық сотында қаралып жатыр.
Тергеу мәліметіне сәйкес, Ернар Жиембайға Қылмыстық кодекстің 24-бабының 3-бөлігі (Қылмысқа дайындалу және қылмысқа оқталу) және 99-баптың 1-бөлігі (Адам өлтіру) бойынша айып тағылды. Айыптау актісі бойынша 21 сәуір күні түсте мердігерлердің жиналысы өткен. Сол жиыннан кейін күдікті Берденовтің өзін жұмыстан шығару туралы айтқан сөзін телефон арқылы естіген көрінеді.
«Шымкент қаласы әкімдігінің құрылыс нысандарының мониторинг жүргізу басқармасының бөлім басшысынан ұялы телефон арқылы Шымкент қаласы әкімінің орынбасары Руслан Берденовтің «Тұрғын үй Шымкент» жауапкершілігі шектеулі серіктестігі директоры лауазымынан өз еркімен арыз жазып кетсін деген туралы айтқанын естіп адам өлтіру, яғни, құқыққа қарсы қарақана қазаға ұшырату ойы пайда болған», — дейді мемлекеттік айыптаушы.
Мұны естіген айыпталушы алкогольдік ішімдік ішіп, қылмыстық істі жүзеге асыру мақсатында дайындалғаны белгілі болды. Айыптау актісіне сай, ол алдымен танысынан аңшылыққа баратынын айтып 12 калибрлі аңшылыққа арналған Сайга-12 қаруын алған. Кейін 9 дана патроны бар ақшылық қаруын Тұран-2 мөлтекауданы Қожаберген жырау көшесінің аяғына барып атып көрген. Өзін жол бойы алып жүрген адамға ниетін айтпай, үйге баратын кейіп танытып, қалалық әкімдікке келген.
«Жиембай 2025 жылы 21 сәуір сағат 20:55 шамасында Берденов әкімдік ғимаратының Б корпусынан шыққанын көріп, соған қарай 12 калибрлі Сайга-12 аңшылық қаруымен жүгіріп келе жатып, қолындағы ақшылық қаруын оқтап, KIA К8 мемлекеттік номерлі автокөлікті айналып қашып жүрген Берденовті қасақана өлтіру мақсатында 5 рет патронды атып, криминалистикалық сот сараптама қорытындысына сәйкес оң кеудесіне еніп, өкпенің төменгі бөлігіне өтіп көптеген жарақат салып, жәбірленушіге ауыр жарақат салған», — дейді прокурор Ерлан Сәдібеков.
Одан әрі Жиембай ойға алған әрекетін жүзеге асыру үшін жерге құлаған Берденовті атпақ болған. Алайда оқ дәрумендерінің таусылуына байланысты қару атылмай қалыпты. Оған жәбірленуші қарсы шыққанда көлікте болған куәгер, сезіктіні тоқтатып үлгерген көрінеді.
Жәбірленуші тараптың адвокаты айыптау актісіне келіспейтінін айтып, қайта тергеу жүргізіп 99-баптың 2-бөлігін де қосуды сұрады. Бірақ прокурор тергеу барысында барлық мән-жай қаралғанын айға тартты. Сондықтан сот бұл өтінішті қараусыз қалдырды.
Күдіктінің келісімімен процесс алқа билердің қатысуынсыз, жеке дара судья қарауымен өтеді. Алайда Жиембай іс кезінде суретке түсіруге келіспеді.
Алдын ала тыңдауға Берденов қатыса алмады. Судья келесі отырысқа жәбірленушінің қатысуын талап етті.
«Берденов жауап беру керек. Талап беру бойынша босатуға құқықтарымыз бар. Бірақ басында жауап беру керек», — деді судья Абинұр Қарабаев.
Сот залында Ернар Жиембай тергеу кезінде қысым көргенін айтты. Айтуынша, бұл жай айыптау емес – ол өз сөзін дәлелдермен негіздеуге әзір. Ал сот талқылауы 6 тамызға қойылды.
Айта кетейік, Жиенбай тергеу кезінде әйелімен ажырасуға арыз берген көрінеді. Ал сот басталмай тұрып, күдікті әйеліне «Балаларға қара, арыңды сақта» деп айтып, келіншегін жылатып қойған. Әйелі сотта куәгер ретінде қатыстады. Ал сезіктінің әкесі қорғаушы ретінде таныстырылды.