Қызылорда. 30 шілде. BM.KZ – Арал қаласында абаттандыру мен құрылыс жұмыстары қарқын алды
Соңғы үш жылда Арал қаласында 104,0 млн теңгеге көппәтерлі 6 тұрғын үйге күрделі жөндеу жұмыстары жүргізілді. Соның ішінде тұрғындарға қолайлы орта қалыптастыру мақсатында 16 пәтерлі тұрғын үйдің жөндеу жұмыстары биыл аяқталып, пайдалануға берілді.
Сонымен қатар, қаланың кіреберіс қақпасын қайта жаңғыртуға 15 млн 700 мың теңге бөлініп, ескі қақпаның сыртқы бөлігі жаңартылды. Жарық шамдары қайта орнатылып, қақпа қазақы оюмен әрленді.
Ауданға қарасты елді мекендер ішінде санитарлық тазалық пен абаттандыруға баса назар аударылып, тұрғындар үшін жайлы аймаққа айналған елді мекендердің бірі – Аманөткел ауылы. 2024 жылы аймақта өткен «Үлгілі елді мекен» конкурсында бұл ауыл «Үлгілі ауыл» номинациясы бойынша III орынды иеленді.
Ауыл халқының негізгі кәсібі – балық және мал шаруашылығы. Бүгінде заманауи технологиямен тамшылатып суару әдісі арқылы егін шаруашылығы да қарқынды дамып келеді.
Тоғыз жолдың торабында орналасқан елді мекеннің 5 көшесіне асфальт жол төселіп, 7 көшесіне түнгі жарық шамдары орнатылды. Елді мекеннің әлеуметтік-экономикалық дамуы, өсу қарқыны мен географиялық орны оның келешегінің кемел екенін аңғартады.
Аманөткел ауылындағы 7 мыңға жуық қаратал, терек және жеміс ағаштары бар саябақ бүгінде тұрғындардың сүйікті демалыс орнына айналған. Ауыл орталығындағы «Тағзым» алаңы мен «Нұртуған» кесенесі аумағына отырғызылған 300-ден астам ағаш қазір күтіп-бапталып жатыр.
Биыл елді мекендегі әлеуметтік нысандардың аумақтары толық абаттандырылып, барлығы 1000-ға жуық ағаш көшеттері егілді.
2025 жылы Арал ауданындағы республикалық, облыстық және аудандық маңызы бар автомобиль жолдары бойында жасыл белдеулер құру жөніндегі іс-шаралар жоспары бекітілді.
Аталған жоспарға сәйкес, Аманөткел елді мекеніне кіре беріс автомобиль жолының бойында жалпы аумағы 0,5 гектарды құрайтын жасыл белдеу құру көзделіп отыр. Қазіргі таңда мұнда 200 түп терек және қара тал ағашы отырғызылды. Жоба 2025-2026 жылдардың көктем және күз айларында демеушілер есебінен жалғасатын болады.
Қаладағы тарихы мен архитектуралық ерекшелігімен танылған Арал теңізі станциясының вокзал ғимараты қазіргі таңда күн тәртібінде тұр. Мемлекет меншігіндегі тарихи-мәдени нысан ретінде оның құрылыс жұмыстары алдағы уақытта нақтыланатын болады.
Мемлекет басшысының бастамасымен қолға алынған «Таза Қазақстан» республикалық экологиялық жобасы аясында Қызылорда облысының Арал ауданында санитарлық тазалықты сақтау, абаттандыру және тұрғындар үшін қолайлы өмір сүру ортасын қалыптастыру бағытында ауқымды жұмыстары атқарылды.
Соңғы жылдары аудан аумағында қолға алынған ауқымды жобалармен қатар құрылыс жұмыстары да қарқынды жүргізіліп келеді. Олардың басым бөлігі бүгінде халық игілігіне берілді. Сонымен қатар, бюджет қаражаты есебінен Арал қаласындағы көпқабатты тұрғын үйлер мен кіреберіс қақпа күрделі жөндеуден өтіп, жаңаша кейіпке енді.