Шымкент. 31 шілде. BM.KZ. /Әсел Мәдәліқызы/ – Шымкент қаласында соңғы айларда өрт саны күрт көбейіп, қауіп деңгейі күрделене түсті. 2025 жылдың алғашқы алты айында қалада 225 өрт тіркеліп, бұл өткен жылдың дәл осы кезеңімен салыстырғанда 72 пайызға жоғары көрсеткіш.
Алайда, шілде айының қорытындысы бойынша өсімнің қарқыны бәсеңдеген – өрт саны 59 пайыздық деңгейде қалып отыр. Соған қарамастан, мамандар тұрғындардан барынша сақ болуды сұрайды. Қаланың бірнеше аумағында – бос жатқан жерлер, құрғақ өсімдік басқан алаңдар мен жеке тұрғын үйлердің маңында өрт қаупі жоғары.
Ең көп өрт тұрғын үйлерде тіркелген – 96 жағдай. Екінші орында – автокөліктердегі өрт, бұл бағытта 58 оқиға орын алған.
Өрт оқиғаларына байланысты мамандар алаңдаушылық білдіріп жатыр. Шымкент қаласының ТЖД өкілдері жыл басынан бері тіркелген фактілердің негізгі себептерін атады.
«Тұрғын үйлердегі өрттердің басым бөлігі 1950–1960 жылдары салынған ескі үйлерде туындайды. Мұндай үйлерде электр желілері тозып, қазіргі заманғы тұрмыстық техникаларға төтеп бере алмайды. Қосымша орнатылған кондиционер, кір жуғыш машина немесе электр пештері жүйеге артық салмақ түсіреді. Бұл – өрттің жиі шығуына әсер ететін негізгі факторлардың бірі», – дейді Шымкент қаласы ТЖД бастығының орынбасары Сергей Огай.
Сонымен қатар, автокөліктерге қатысты жағдай да күрделі. 1990–2000 жылдары шығарылған, 20 жылдан астам уақыт пайдаланылып жүрген ескі көліктердегі өрт фактілері артып отыр. Мамандар сөзінше бұл техникалардың электр жүйесі әбден тозған, ал оларды жөндейтін кәсіби мамандар мен сапалы техникалық байқау станциялары жетіспейді.
«Шымкенттегі 45–47 градусқа дейін көтерілетін аптап ыстық көліктердің техникалық жағдайына кері әсер етеді. Әсіресе, электр сымдары мен жанармай жүйесі қызып, тұтану қаупін тудырады», – дейді Сергей Огай.
Қауіп қайдан?
Өрттің негізгі себептері:
– Отты абайсыз қолдану (темекі шегу, қоқыс жағу, мангал жағу);
– Электр жабдықтарын пайдалану ережелерін бұзу;
– Істен шыққан тұрмыстық техника (шайнек, пеш, т.б.);
– Балалардың отпен ойнауы;
– Электр желісінің шамадан тыс жүктелуі.
Қаланың қауіпті аймақтары – бақылауға алынған
Қала шетіндегі құрғақ шөпті алқаптар, орманды және екпе аймақтар да өрт қауіпі бар аумақ ретінде есепке алынып, тұрақты бақылауға алынған.
Өрттің алдын алу мақсатында тұрғындарға қауіпсіздік ережелерін сақтап, от жағуға болмайтын аумақтарда өртке себеп болатын әрекеттерден бас тарту керектігі ескертіледі.