Астана. 4 тамыз. BM.KZ – Көлік вице-министрі пара алды деген күдікке ілінді. Бұл туралы Ұлттық қауіпсіздік комитетінің баспасөз қызметі хабарлады.
ҰҚК-нің жариялаған бейнежазбасына қарағанда шенеуніктің үйін және жұмыс орнын тінту барысында қомақты қаражат табылған. Оны мамандар құмыраның ішінен алып шыққаны байқалады.
«ҰҚК-ның сыбайлас жемқорлыққа қарсы қызметі ҚР Көлік вице-министрін пара алу күдігі бойынша ұстады. Сот санкциясымен ол қамауға алынды», – делінген хабарламада.
Бейресми дерекке сай қамауға алынған сезікті Сәтжан Аблалиев. Бұл қызметке Сәтжан Аблалиев 2023 жылдың қазан айында тағайындалған. Оған дейін ол шамамен екі жыл бойы Солтүстік Қазақстан облысы әкімінің орынбасары қызметін атқарған.
Дегенмен, ҚР Көлік министрлігінің парақшасында ол әлі вице-министр қызметінде тұр.
Айта кетейік, Сәтжан Аблалиев 1970 жылы Атырау облысы, Жылыой ауданы, Биікжал ауылында дүниеге келген. Ол Алматы автомобиль-жол институтының «Инженер-құрылысшы» мамандығы және Қазақ қатынас жолдары университетінде «Инженер-экономист» мамандығын бітірген.