Шымкент. 4 тамыз. BM.KZ/Нұргүл Ерғалиқызы/ – Мемлекеттік қызметтегі ата-аналарға икемді жұмыс кестесі енгізілді. Бұл туралы Мемлекеттік еңбек инспекциясы комитеті төрағасының орынбасары Ерболат Әбулхатын мәлімдеді.
Жаңа ережеге сәйкес, енді мектепке немесе балабақшаға баласын апаратын мемлекеттік қызметкерлер таңертең жұмысқа кешігіп келуге рұқсат алады. Бұл бастама ата-аналардың отбасылық жауапкершіліктерін еңбек міндеттерімен тиімді үйлестіруіне мүмкіндік беруді көздейді.
Жаңа жүйе бойынша, ата-аналар таңертеңгі уақытта жұмысқа біршама кешігіп келуіне рұқсат алады, бірақ жұмыс уақытын толық орындауы тиіс.
Мәселен, жұмыс күнін сағат 9:00-де немесе 10:00-де бастауға мүмкіндік бар. Десе де, 8 сағаттық жұмыс уақыты сақталуы тиіс. Яғни, жұмысын 10:00-де бастаған қызметкер кешкі 19:00-ге дейін жұмыста болуы қажет.
Бұл өзгеріс ата-аналарға балаларымен көбірек уақыт өткізуге жағдай жасап, отбасылық міндеттерді жұмыспен қатар алып жүруге мүмкіндік береді. Бірақ, жұмысты да, тыңғылықты атқару керек дейді мамандар.
«Әйелдер азаматтарға тағы бір мамандық қосылды. «Логистик» деген . Өйткені, ол балаларын балабақшаға апарып тастау керек. Немесе жолдасымен бөлісіп. Мектепке алып барып тастау керек. Алып кету керек. Барлығын ойланып, график бойынша алып жүру қажет. Бұрынғы заманмен салыстыру қиын. Балалар бұрын өзі қайтушы еді. Қазір оларды алып кету керек. Қауіпсіздігіне көңіл бөлу керек. Осындай мәселелер көп. Әйел адамдардың функционалдық міндеттері өте көп», — дейді «Қазақстан әйелдерінің республикалық кеңесі» қоғамдық бірлестігінің филиалы- Шымкент қалалық әйелдер кеңесінің төрайымы Баян Жандосова.
Қоғамда балалы отбасылардың міндеті көп. Әсіресе, жасөспірім балалары бар аналар, таң азанымен шапқылайтыны рас. Оларға жағдай жасау, елдің міндеті. Бірақ, тәртіпке де бас иген дұрыс дейді Баян Жандосова.
«Тәртіп әр жерде болу керек. Маман ретінде, жұмыс істегің келсе, 8 сағат жұмыс істеу керек. Үкімет осындай жағдай жасап жатса, әр адам, өз сана сезіміне орай жұмысын дұрыстап атқару керек. Өйткені, қазақ келіндеріне қиындау. Жақсы келін болу керек. Бірақ, жұмысынан қалмау керек», — дейді «Қазақстан әйелдерінің республикалық кеңесі» қоғамдық бірлестігінің филиалы- Шымкент қалалық әйелдер кеңесінің төрайымы Баян Жандосова.
Көптеген ата-аналар бұл жаңалықты жылы қабылдады. Әлеуметтік желілерде ата-аналар аталған бастаманы қолдап, оның өзектілігін атап өтуде. Десе де, жұмыс беруші тараппен келісім болуы қажет. Өйткені, сіз жұмысқа қабылданбас бұрын, түзілген еңбек шарты бар.