Астана. 6 тамыз. /Нұргүл Ерғалиқызы/ BM.KZ – Елде «Неке (ерлі-зайыптылық) және отбасы туралы» кодекске енгізілген өзгерістерге сәйкес, 2025 жылғы 16 қыркүйектен бастап некені бұзу рәсімі жеңілдетіледі.
Жаңа ережеге сәйкес, енді ерлі-зайыптылардың кәмелетке толмаған балалары болса да некені бір тараптың өтініші бойынша бұзуға мүмкіндік беріледі.
Бұл мүмкіндік мына жағдайларда қарастырылады:
-сот шешімімен хабар-ошарсыз кеткен деп танылса;
-әрекетке қабілетсіз немесе шектеулі қабілетті деп танылса;
-үш жылдан астам мерзімге бас бостандығынан айырылған болса;
-немесе үш жылдан астам уақыт бойы халықаралық іздеуде жүрген жағдайда;
Жоғарыда көрсетілген себептер анықталған жағдайда, некені біржақты тәртіппен бұзу мүмкін болады.
Бұл өзгерістер азаматтардың құқықтарын қорғауға және сот процесін оңтайландыруға бағытталған.
Айта кетейік, Finprom.kz мәліметінше, Қазақстанда ажырасудың ең жоғары деңгейі 4 жылға жетпей бірге тұрған жұптар арасында тіркелген. 2024 жылы мұндай некелердің үлесі 35%-ды құрады. Екінші орында – 5-9 жыл бірге өмір сүрген ерлі-зайыптылар (25%).
Ал, жалпы ресми статистикаға сүйенсек, 2023 жылы 120,8 мың неке тіркелген болса, 40,2 мың ажырасу фактісі орын алған. 2024 жылы ажырасу саны 61 080-ге дейін өсті, бұл жалпы неке санының жартысына жуығын құрайды. Бұл деректер алаңдатарлық демографиялық жағдайды, сондай-ақ, отбасы институтының әлсірегенін көрсетеді.