Астана. 6 тамыз. BM.KZ – Оны «Внуково» әуежайында Ресейдің Тікелей инвестициялар қорының басшысы, Ресей президентінің шетел мемлекеттерімен экономикалық ынтымақтастық жөніндегі арнайы өкілі Кирилл Дмитриев қарсы алды. Бұл туралы ТАСС агенттігі келіссөздерге жақын дереккөзге сілтеме жасап хабарлады.
Бұған дейін Уиткофф Ресей президенті Владимир Путинмен 4 рет кездескен. Алғашқы кездесу 11 ақпанда, одан кейін екінші және үшінші рет 13 наурыз бен 11 сәуірде өткен еді. Соңғы рет арнайы өкіл 25 сәуірде Кремльде болып, Мәскеу мен Киев арасындағы тікелей келіссөздерге қайта оралу мүмкіндігін талқылаған.
NBC News телеарнасы келіссөздердің барысымен таныс үш шенеунікке сілтеме жасап, америкалық дипломат Ресей президентімен болған үш кездесуде ресейлік аудармашылардың көмегіне жүгінгенін хабарлады. Арна дерегінше, Уиткофф түсініксіз себептермен келіссөздерге америкалық аудармашыларын қатыстырмаған, бұл АҚШ дипломатиялық тәжірибесі үшін қалыпты жағдай емес. Арнайы өкілдің өзі орыс тілін меңгермеген.
АҚШ президенті Дональд Трамп бұған дейін Украина қақтығысын реттеу бойынша ілгерілеу болмаса, Ресейге қарсы екінші деңгейлі баж салығын енгізетінін ескерткен болатын. АҚШ басшысы 29 шілдеде талаптарды орындау мерзімін 50 күннен 10 күнге дейін қысқартты. Бұл мерзім 8 тамызда аяқталуы тиіс.