Шымкент. 6 тамыз. /Әсел Мәдәліқызы/ BM.KZ – Шымкент қаласы әкімінің орынбасары Руслан Берденовке жасалған қастандыққа қатысты басты сот талқылауы басталды. Бүгін сотта айыпталушы Жиембайдың сөзі тыңдалды.
Ернар Жиембайдың үстінен «Қылмысқа дайындалу және қылмысқа оқталу» және «Адам өлтіру» баптары бойынша іс қозғалған еді. Сотта сөз алған ол кінәсін ішінара мойындайтынын, бірақ адам өлтіргісі келмегенін, қылмысқа барудағы басты мәселе қызғаныш екенін айтты.
«Ең басты мәселеден бастайын. Өкінемін, бұған себеп қызғаныш. Ар-ұжданым, намысым деп айта аламын. Жұмысқа қатысы жоқ», – деді Ернар Жиембай.
28 шілдеде өткен тыңдауда күдікті сот басталмай тұрып әйеліне «ар-намыс» жайлы айтқаны жайлы ақпарат беріп едік. Алайда прокурор айыптау актісінде қылмыстық іс Берденов Жиембайды «Тұрғын үй Шымкент» ЖШС директоры лауазымынан өз еркімен арыз жазып кетсін деп айтқаннан шықты деген болатын.
Алдына ала тыңдауда жәбірленуші Берденов іске денсаулығына қатысты қатыспаған еді. Бірақ сот оның сөзін тыңдау керегін айтып, басты талқылауға келуін тапсырған. Алайда бұл жолы да қазіргі жай-күйіне байланысты келе алмаған.
Айта кетейік, айыпталушы Жиембай 21 сәуір күні қалалық әкімдік алдында Берденовке бірнеше рет оқ атып, ауыр жарақат салған. Күдікті оқиға орнында ұсталып, қамауға алынған еді.