Астана. 7 тамыз. BM.KZ – Әскери қызметшілер тұрғын үй төлемдерінің қолданыстағы шарттарын сақтауды, өзгерістердің кейіннен күшіне енуіне жол бермеуді талап етіп, петиция жариялады. Петиция gosrating.com сайтында жарияланған.
Нақтырақ айтқанда, тұрғын үй төлемдері бойынша қазіргі жағдайды нашарлатпай сақтап қалуды, қызметін өткеріп жүрген әскери қызметшілерге әсер ететін өзгерістердің кейіннен күшіне енуіне жол бермеуді талап еткен. Сондай-ақ, кез келген реформаны әзірлеу кезінде әскери қызметшілердің пікірін ескеріп, Қорғаныс министрлігі, әскери қызметшілер мен қоғам өкілдерінің қатысуымен ашық талқылау өткізуді сұрайды.
Өз азаматтарының қауіпсіздігі үшін күн сайын өмірін қатерге тігетін жандар алдында мемлекет өз міндеттемелерін орындауға тиіс деп санайды.
Айта кетейік, 1 шілдеден бастап қызметке кірген тұлғаларға «Тұрғын үй қатынастары туралы» заңға мемлекеттік органдар қызметкерлеріне тұрғын үй төлемдерін беру тәртібіне қатысты бірқатар өзгерістерді көздейтін түзетулер енгізу ұсынылған еді. Бұл талаптар оған дейін істеп жатқан қызметкерлерге қолданылмайды.
Атап айтқанда, тұрғын үй төлемдерін алу құқығын прокуратура қызметкерлеріне, азаматтық қорғау қызметіне және экономикалық тергеп-тексеру қызметінің қызметкерлеріне де лауазым тізбесі бойынша тарату ұсынылады. Қазіргі уақытта мұндай төлемдер тек әскери қызметшілерге, арнайы мемлекеттік органдардың, ішкі істер органдарының, сондай-ақ Сыбайлас жемқорлыққа қарсы қызметтің жедел-тергеу бөлімшелерінің қызметкерлеріне ғана қарастырылған.
Құқық қорғау органдарының 20 жылдан астам қызмет өтілі бар қызметкерлеріне мемлекеттік тұрғын үй қорынан берілген тұрғын үйді өтеусіз жекешелендіру құқығы беріледі. Қазір мұндай құқық тек әскери қызметшілерде, арнайы мемлекеттік органдар мен ішкі істер органдары қызметкерлерінде ғана бар. Сонымен қатар, тұрғын үй төлемдері енді тек 90 шаршы метр тұрғын үйге ғана есептелетін болады. Қазіргі кезде мұндай шектеу мүгедектігі бар адамдарға, көпбалалы отбасыларға және жетім балаларға арналған әлеуметтік тұрғын үй беру кезінде қолданылады.
Қазір әскери қызметшілер мен арнайы мемлекеттік органдардың қызметкерлері жұмыстан босатылған кезде біржолғы тұрғын үй төлемдерін алады. Жаңа ережелерге сәйкес, бұл төлемдердің құны тек ипотека бойынша қалған берешекті өтеуге ғана бағытталмақ.