Астана. 7 тамыз. /Нұргүл Ерғалиқызы/ BM.KZ – Бүгін Астанада тоғызқұмалақтан Қазақстан чемпиондары мен жасанды интеллект арасындағы алғашқы тарихи жекпе-жек өтіп жатыр. Бұл адамзат ақылы мен цифрлық алгоритм арасындағы есте қаларлық зияткерлік бәсеке болып отыр.
«Тоғызқұмалық vs ЖИ» атты ерекше шарада жасанды интелектке қарсы еліміздің үздік спортшылары ел намысын қорғап жатыр. Олардың қатарында бес дүркін Қазақстан чемпионы, оқушылар арасындағы тұңғыш әлем чемпионы, жастар арасында Азия чемпионы, сондай-ақ әйелдер арасындағы Азия және әлем чемпионаттарының жүлдегері, V Дүниежүзілік Көшпенділер ойындарының чемпионы Аяна Исахан, халықаралық дәрежедегі спорт шебері, әлем чемпионы, тұңғыш «Қазақстан Зияткері» атағының иегері, 2024 жылғы «Алтын Тұғыр» ұлттық сыйлығының лауреаты, V Дүниежүзілік Көшпенділер ойындарының жеңімпазы Асылхан Қожанәсіп бар.
Чемпиондарға қарсылас ретінде күрделі алгоритмдермен жұмыс істейтін интеллектуалды компьютерлік бағдарлама шықты. Бұл, ұлттық ойынды жаңа форматта танытатын, заманауи IT шешімдерінің нақты үлгісі болып отыр.
Жоба тек спорттық шара емес, ұлттық мұра мен технологияны ұштастыратын символдық оқиға болмақ. Жоба авторы, жас, әрі талантты бэкенд әзірлеуші Нурске Абылай.
Ұйымдастырушылар бұл жоба ұлттық ойынның беделін арттырып, зияткерлік спортты жаңа деңгейге көтеретін бастама екенін айтады.