Астана. 7 тамыз. BM.KZ – Есірткі таратуға күдікті деп танылған қазақстандықтардың жақындары қылмыстық істің мән-жайын жариялауға қарсы.
Сыртқы істер министрлігі есірткінің заңсыз айналымына байланысты қылмыстық құқықбұзушылық жасады деген күдікпен ұсталған Қазақстанның екі азаматының тағдыры туралы хабарлады.
«Индонезия аумағында Қазақстанның екі азаматының ұсталуына байланысты мәселе ҚР Сыртқы істер министрлігінің және Индонезия Республикасындағы Қазақстан Республикасы елшілігінің ерекше бақылауында», – деп хабарлады СІМ BM.KZ редакциясының ресми сұрауына берген жауабында.
Сыртқы саясат ведомствосының мәліметінше, оқиға туралы ақпарат алынған сәттен бастап елшілік жағдайды үнемі бақылауда ұстап, аталған азаматтардың құқықтары мен заңды мүдделерін қамтамасыз ету үшін халықаралық және ұлттық заңнамада көзделген қажетті шараларды қабылдап келеді.
«Екі елдің қылмыстық-процестік заңнамасын сақтау мақсатында, сондай-ақ, ұсталғандардың жақындарының ерік-жігерін ескере отырып, олардың келісімінсіз қылмыстық істің мән-жайы мен егжей-тегжейін жариялау мүмкін емес. Дегенмен, Индонезия заңнамасына сәйкес сот талқылауы ел аумағында белгіленген тәртіп пен мерзімдерге сәйкес өтетінін хабарлаймыз. Жаза қолдану, ұстау шарттары және заңды қорғау тактикасы мәселелері де Индонезияның сот жүйесінің ерекше құзыретіне жатады», – деп атап өтті СІМ.
Сонымен қатар, ведомство Қазақстан тарапы өз азаматтарының құқықтарын, соның ішінде әділ сот талқылауына және ізгілікті қарым-қатынасқа құқығын сақтауды дәйекті түрде қолдайтынын, бірақ мұндайда қабылдаушы мемлекеттің егемендігін толық құрметтейтінін нақтылады.
«Ұсталғандармен консулдық байланыс Индонезия билігі белгілеген тәртіп аясында жүзеге асырылады. ҚР азаматтарынан ұстау жағдайларына қатысты шағымдар түскен жоқ», – деп атап өтті Сыртқы істер министрлігі.
Бұған дейін хабарланғандай, 2025 жылдың сәуірінде Индонезияның Бали аралында Қазақстанның екі азаматы ұсталып, олардан шамамен 49 грамм кристалды метамфетамин табылған болатын.
Индонезия заңнамасы есірткінің заңсыз айналымы үшін ең қатаң жазалардың бірін, әсіресе таратуға қатысты болса, өлім жазасына дейін қарастырады.
Бұл оқиға Индонезияда 2025 жылдың сәуірінен маусымына дейін жүргізілген ауқымды есірткіге қарсы операцияның бір бөлігі болды. Операция барысында 285 адам, оның ішінде Қазақстанның екі азаматы ұсталып, 0,68 тоннадан астам түрлі есірткі тәркіленді.