Астана. 8 тамыз. /Нұргүл Ерғалиқызы/ BM.KZ – Еліміздің бірқатар аймағында 8-10 тамыз аралығында күн райының күрт өзгеруіне байланысты дауылды ескертулер жарияланды. Бұл туралы ТЖД хабарлады.
Синоптиктердің мәліметінше еліміздің бірнеше өңірінде ауа райы қолайсыз болып, тұрғындардың өмірі мен денсаулығына қауіп төндіруі мүмкін. Мәселен, оңтүстік және батыс аймақтарда күн қатты ысиды. Ауа температурасы +44 °C дейін көтерілуі ықтимал.
Мұндай ыстық әсіресе қарт адамдар мен балаларға, сондай-ақ жүрек-қан тамырлары аурулары бар азаматтарға кері әсер етуі мүмкін.
Сонымен қатар, еліміздің көптеген облысында өте жоғары өрт қаупі сақталады.
Солтүстік, шығыс және орталық өңірлерде найзағай, бұршақ, дауыл және шаңды дауыл болады деп күтіледі.
Сонымен қатар, кей жерлерде жел екпіні 20 м/с дейін жетуі мүмкін.
Төтенше жағдайлар министрлігі азаматтарға қауіпсіздік шараларын қатаң сақтауға шақырады. Сондай-ақ, ресми дереккөздерден келіп түсетін ескерту хабарламаларын мұқият бақылап отыру қажеттілігін айтады.